VOV4.Êđê- Hruê mbruê, knơ̆ng bruă mdrao mgŭn ƀuôn prŏng Hồ Chí Minh bi klă boh tŭ klei ksiêm mkă hlăk mblang gen bi klă sa čô mniê djŏ klei ruă čut kra. Anei jing pô djŏ klei ruă čut kra tal êlâo ti Việt Nam. Hluê si phŭn bruă mdrao mgŭn, mniê ruă anei 35 thŭn, dôk ti ƀuôn prŏng Hồ Chí Minh, kčưm bluh mâo klei ruă hruê 18/9/2022 êjai hiu čhưn ênguê ti Dubai (mơ̆ng mlan 7/2022 truh kơ hruê 22/9/2022 wĭt kơ Việt Nam) hŏng dŭm klei bi knăl êngoh hlơr, êmăn hlăm asei mlei, bi êăt, ruă boh păl, ruă akŏ leh anăn mtŭk, blĕ kđuč hrah, ktal ti kngan, asei mlei leh anăn ƀô̆ mta. Leh wĭt ti Việt Nam ti hruê 23/9/2022, pô ruă anei nao mkă dlăng ti sang êa drao Từ Dũ leh anăn mâo klei đĭng djŏ klei ruă tưp, dưi ba ti sang êa drao klei ruă hlăm klĭt ƀuôn prŏng Hồ Chí Minh. Tinei, nnuih ruă dưi bi ktlah, mă mta ksiêm mkă, truh kơ hruê 25/9/2022, mnuih ruă mâo boh tŭ klei ksiêm mkă mâo kman čut kra. Ară anei, mnuih ruă mâo klei suaih prăl hơĭt, amâo lŏ êngoh, dôk bi ktlah hjăn, mdrao mgŭn ti sang êa drao krĭng hlơr ƀuôn prŏng Hồ Chí Minh.

Pô mblang: Y-Ƀel Êban