Anăn jing klei khua phŭn bruă lŏ hma Mi Thomas Vilsack lač ti anôk bi tuôm tlam mbrue 19/4, ti Hà Nội, ƀri gưl hriê čhưn ti Việt Nam. Klei hriê čhưn anei dôk hlăm hdră bi hdơr 10 thŭn mkŏ mjing klei hgŭm bruă kluôm dhuôm Việt Nam – Mi, lŏ dơ̆ng bi kjăp klei hgŭm dua nah, mâo klei bi mnia mblei kjăp dua ala čar.

Ti anôk bi tuôm hŏng phung ngă bruă klei mrâo, Khua phŭn bruă lŏ hma Mi Thomas Vilsack lač, klei bi mguôp Mi - Việt Nam hlăk dôk mtrŭn agha êlam. Pŏk lu klei găl kơ bruă bi mnia mblei, boh nik hlăm bruă lŏ hma, ñu mă leh bruă hŏng dŭm anôk bruă djŏ tuôm kñăm duah djăp klei găl mâo ba čhĭ mnơ̆ng mơ̆ng Mi kơ Việt Nam lehanăn mnơ̆ng mơ̆ng Việt Nam kơ Mi.