Ti anôk bi kƀĭn anei srăng trông čhai kơ klei hưn mdah jih leh klei ruă tưp Covid 19 ti Việt Nam. Êlâo anăn, khua knŭk kna Phạm Minh Chính gĭt gai leh phŭn bruă mdrao mgŭn mprăp hră mơar kơ klei ruă tưp Covid-19 jing klei ruă tưp ti hnơ̆ng A nao kơ hnơ̆ng B (si tôhmô mơ̆ng mta klei ruă bi mtưp prŏng djiê mnuih lu, nao hlăm êpul jing klei ruă tưp mâo klei bi mtưp pral, tăp năng truh kơ djiê mơh), lehanăn anăp truh hưn jih klei ruă tưp anei ti Việt Nam. Mă klei hriăm mơ̆ng klei tuôm găn leh hlăm bruă mdrơ̆ng hŏng klei ruă tưp, phung bi ala bruă kƀĭn ala mơ̆ng dhar bruă mdrao mgŭn lač: Việt Nam dưi hơĭt leh ai tiê lač klei ruă tưp Covid-19 jih leh djŏ hŏng ênoh čuăn kčah. Việt Nam djăp leh 3 mta phŭn năng mđing dưi hơĭt ai tiê jih leh klei ruă tưp Covid-19.

Kyuadah hnơ̆ng ênoh klei ruă đuĕ nao kơ kjham păt dah amâo mâo lu ôh. Bi ênoh mnuih djiê lu jing mnuih mâo leh klei ruă êlâo, lŏ djŏ hĕ mbĭt hŏng kman klei ruă tưp Covid-19, ƀiădah klei ruă tưp anei ăt dôk mâo klei bi mtưp hlăm yang ƀuôn, ƀiădah ti hnơ̆ng amâo mâo lŏ huĭ hyưt ôh, amâo mâo truh kơ djiê ôh. Mbĭt hŏng anăn, Việt Nam mâo tlŏ leh vaccine păt čiăng ênŭm. Mâo leh 266 êklăk hnơ̆ng ênoh mâo tlŏ kơ mnuih mơ̆ng 12 thŭn kơ dlông dua aruăt sơăi. Bi aruăt tal 4 mâo tlŏ leh kơ mnuih 18 thŭn kơ dlông. Snăn dlông rŏng lăn ăt ƀuh jing hrŏ leh mơh klei ruă tưp. Akŏ mlan 5-2023, Êpul bruă mdrao mgŭn dlông rŏng lăn hưn mdah leh klei ruă tưp Covid-19 amâo lŏ jing klei ruă huĭ hyưt ôh tar rŏng lăn./.