VOV4.Êđê - Mơ̆ng dŭm boh tŭ dưn jăk leh lông poĭk ƀăng kơ bruă hiu čhưn ênguê hŏng tuê mơ̆ng ala tač êngao, leh êbeh 2 mlan ngă bruă, Phŭn bruă dhar kreh, mjuăt asei mlei, hiu čhưn ênguê mâo leh klei bi tŭ ư hŏng dŭm phŭn dhar bruă, lehanăn alŭ wăl kơ bruă srăng wĭt pŏk ƀăng hŏng tuê hiu čhưn ênguê mơ̆ng ala tač êngao mơ̆ng mlan 5 ti anăp. Yap mơ̆ng mlan 11 thŭn dih truh kơ ară anei, Việt Nam mâo drông leh truh 8 êbâo 500 gưl čô mnuih mơ̆ng ala tač êngao truh 3 alŭ wăl jing Phú Quốc, Khánh Hoà, Quảng Nam. Jih jang phung tue truh kơ Việt Nam bi êdah klei jăk, kơ bruă drông tuê hŏng klei êđăp ênang. Ƀuh mơ̆ng boh tŭ dưn anăn, Phŭn bruă dhar kreh, mjuăt asei, hiu čhưn ênguê akâo leh hdră pŏk ƀăng bruă hiu čhưn ênguê hŏng tue ala tač êngao hŏng klei msĕ si aguah tlam mrâo. Tui si phung duh mkra, bruă bi êdah hnưm klei pŏk ƀăng srăng đru sa kdrêč tue thâo hriê mơ̆ng lu ala čar. Ară anei mâo leh 20 alŭ wăl, jing dŭm anôk phŭn kơ bruă hiu čhưn ênguê mâo klei akâo kơ dŭm phŭn dhar bruă lŏ dơ̆ng đru kơ djăp alŭ wăl čŏng ruah êpul êya bruă drông tue mơ̆ng ala tač êngao./.

Y -Khem pô mblang