Aguah hruê 21/3/2024, ti Klei bi kƀĭn mjêč tal 6, Anôk bruă kƀĭn ala gưl XV  mkŏ mjing ti Sang bruă kƀĭn ala, ƀuôn prŏng phŭn Hà Nội hŏng klei gĭt gai mơ̆ng Khua Anôk bruă kƀĭn ala Vương Đình Huệ čiăng ksiêm dlăng klei brei mdei bruă hŏng Khua lăn čar Việt Nam yang ƀuôn ngă phŭn wưng thŭn 2021 - 2026 lehanăn brei mdei ngă Pô bi ala mơ̆ng Anôk bruă kƀĭn ala gưl XV hŏng Võ Văn Thưởng hlăm Êpul bi ala anôk bruă kƀĭn ala ƀuôn prŏng Đà Nẵng.

Leh hmư̆ klei hưn mdah, klei blŭ mơ̆ng Võ Văn Thưởng, Anôk bruă kƀĭn ala bi trông, mplĕ hră hgăm lehanăn bi mklă Hdră mtrŭn brei mdei ngă Khua lăn čar Việt Nam yang ƀuôn ngă phŭn wưng thŭn 2021 - 2026 lehanăn brei mdei ngă Pô bi ala mơ̆ng Anôk bruă kƀĭn ala gưl XV hŏng Võ Văn Thưởng hlăm Êpul bi ala anôk bruă kƀĭn ala ƀuôn prŏng Đà Nẵng.

Leh mjưh ruê̆ Klei bi kƀĭn mjêč tal 6, Anôk bruă kƀĭn ala gưl XV, hluê hŏng Hdră bhiăn phŭn ala čar Việt Nam yang ƀuôn ngă phŭn lehanăn klei kčah mtrŭn hdră bhiăn djŏ tuôm, Dhar bruă gĭt gai Anôk bruă kƀĭn ala hưn mthâo leh bruă dưi ngă Khua ala čar Việt Nam yang ƀuôn ngă phŭn êjai. Hluê anăn, Võ Thị Ánh Xuân, K’iăng khua lăn čar srăng păn ngă Khua lăn čar Việt Nam yang ƀuôn ngă phŭn êjai mơ̆ng hruê 21/3/2024 truh kơ hbĭl Anôk bruă kƀĭn ala lŏ ruah Khua lăn čar mrâo./.