VOV4.Êđê - Aguah hruê 19.1, ti Anôk bruă Đảng gưl dlông, Anôk bruă gưl dlông gĭt gai bruă ksiêm wĭt Hdră mtrŭn mrô 26 mkŏ mjing leh Klei bi kƀĭn kluôm ala đru mguôp klei blŭ hlăm hră hưn mdah bruă ksiêm wĭt bruă hluê ngă hdră mtrŭn mrô 26 mơ̆ng Anôk bruă kiă kriê gưl dlông tal 10 kơ bruă lŏ hma, mnuih ngă lŏ hma, krĭng ngă lŏ hma. Ti anôk bi kƀĭn, phung bi ala bi êdah klei tĭng dlăng hŏng klei čih mkra hưn mthâo dŭm boh tŭ leh êbeh 13 thŭn hluê ngă hdră mtrŭn hmăi leh prŏng truh kơ krĭng ngă lŏ hma, mnuih ngă lŏ hma lehanăn bruă duh mkra – ala ƀuôn mơ̆ng lăn čar. Hluê anăn, hnơ̆ng đĭ kyar bruă lŏ hma mâo 2,94%; ênoh prăk bi mnia mblei bruă lŏ hma, dliê kmrơ̆ng, mnơ̆ng hlăm êa đĭ 8,17%/thŭn. Hdră bruă ala čar kñăm mkŏ mkra krĭng ƀuôn sang mrâo dưi bi leh êlâo 1 thŭn mkrah...Mơ̆ng hdră bi trông dŭm klei blŭ đru mguôp kơ krĭng ngă lŏ hma, mnuih ngă lŏ hma adôk mâo lu klei gun kpăk, êdu kƀah msĕ si hnơ̆ng đĭ kyar bruă lŏ hma êmưt, ka h’ĭt kjăp. Bruă mkra krĭng ƀuôn sang dôk dôk tuôm hŏng lu klei dleh dlan. Hnư hrui wĭt ti krĭng ƀuôn sang dôk ƀiă, mâo klei bi kpleh plah wah dŭm krĭng kwar, plah wah krĭng ƀuôn sang lehanăn krĭng ƀuôn prŏng adôk lu./.

H’Nêč pô mblang