Blŭ hrăm hlăm Knăm bi hdơr, Khua Knơ̆ng bruă Sang mđung asăp blŭ Việt Nam Đỗ Tiến Sỹ lŏ mñă hƀuê ênuk mkŏ mjing Sang mđung asăp blŭ Việt Nam, sui hŏng anei 79 thŭn, knŏng 5 hruê leh Khua gĭt gai Hồ Chí Minh răk hră klei êngiê hưn hŏng jih jang mnuih ƀuôn sang kluôm ala leh anăn dlông rŏng lăn kơ klei mphŭn mâo mơ̆ng ala čar Việt Nam Dân chủ Cộng hòa, trĭp 11h30 mnĭt hruê 7/9/1945, Sang mđung asăp blŭ Việt Nam (VOV) klă sĭt mphŭn mâo hŏng mmông mđung asăp tal êlâo hŏng klei Yuăn, klei Ăngle leh anăn klei Prăng hŏng pruê̆ blŭ “ Anei jing asăp blŭ Việt Nam, mđung mơ̆ng Hà Nội, ƀuôn prŏng phŭn ala čar Việt Nam dân chủ cộng hòa”.  Hlăm dua klei bi blah bi kdơ̆ng hŏng Prăng leh anăn Mi, Sang mđung asăp blŭ Việt Nam mbĕ đuĕ leh 14 blư̆ čiăng rơ̆ng êđăp ênang jih hnơ̆ng kơ êlan mđung ala čar.

Găn 79 thŭn hriê kơ prŏng leh anăn mđĭ kyar, dŭm gưl phung knuă druh, phung čih klei mrâo, phung mă asăp, phung kưt mmuiñ leh anăn phung mă bruă Sang mđung asăp blŭ Việt Nam hrăm mbĭt sa ai tiê, găn djăp klei dleh dlan, lông dlăng čiăng mkŏ mjing Sang mđung asăp blŭ Việt Nam kjăp ktang năng hŏng klei đăo knang mơ̆ng kluôm Đảng, jih jang mnuih ƀuôn sang. Sang mđung asăp blŭ Việt Nam jing “Asăp blŭ mơ̆ng lăn čar”, mơ̆ng klei êngiê, jing asăp blŭ mơ̆ng Đảng, Knŭk kna leh anăn mnuih ƀuôn sang Việt Nam, ƀĭng găp đăo knang mơ̆ng lu ala čar.