Čar Kon Tum dôk tĭng dlăng jing alŭ wăl dleh dlan hĭn Lăn dap kngư kơ hdră êlan klông. Čar dôk čiăng êdi kơ êlan êran pral čiăng dưi ba yua jih klei găl mâo, boh nik jing Wăl hiu čhưn ênguê ala čar Măng Đen. Lê Ngọc Tuấn, Khua Anôk bruă sang čư̆ êa čar Kon Tum brei thâo, leh klei čih hưn mthâo kơ êlan êran pral ti lăn dap kngư, dưi mđung hlăm kdrăp hâo hưn mơ̆ng VOV, phung khua kiă kriê čar Kon Tum mđing hmư̆ lehanăn tui ksiêm. Dŭm klei čih hưn lač klă hŏng klei dôk mâo, hưn mdah klei mĭn, klei čiăng mơ̆ng bruă sang čư̆ êa lehanăn mnuih ƀuôn sang alŭ wăl. Hŏng Kon Tum, klei mơak truh hnưm, hlăk hdră čuăl mkă krĭng Lăn dap kngư wưng thŭn 2021-2030 mâo hưn mthâo hlăk knhal jih mlan 6 leh êgao, ktuê êlan êran pral Quảng Ngãi- Kon Tum mâo leh Khua knŭk kna ba mdah hlăm hdră čuăl mkă. Hluê si Lê Ngọc Tuấn, ktuê êlan prŏng dơ̆ng pŏk đru kơ Kon Tum đĭ kyar pral hĭn.

 “Dlăng dŭm klei čih mơ̆ng VOV hưn kơ ktuê êlan êran pral ti lăn dap kngư kâo ƀuh jăk êdi hŏng alŭ wăl. Kơ klei anei, Khua knŭk kna ăt mñă leh kơ klei anei. Ară anei, hmei dôk čiăng êdi kơ dŭm ktuê êlan êran pral. Kơ ktuê êlan êran pral Quảng Ngãi- Kon Tum snăn 2 čar ăt akâo kơ Knŭk kna tui duah hdră duh bi liê hluê si hdră PPP.” 

 Nguyễn Thị Thanh Lịch, Kơiăng khua Anôk bruă sang čư̆ êa čar Gia Lai lač snei, klei kpăk gun mơ̆ng čar Gia Lai lehanăn lăn dap kngư jing anôk bruă nah gŭ dưi rơ̆ng kjăp. Dŭm thŭn êgao, čar dôk gĭr iêu mthưr, jak iêu klei duh bi liê, boh nik si srăng ngă čiăng mkŏ mjing dŭm sang maĭ mkra mjing dŭm mta mnơ̆ng lŏ hma, mđĭ boh tŭ yuôm mnơ̆ng lehanăn mđĭ hnư hrui wĭt kơ mnuih ƀuôn sang. Khă snăn, klei kpăk gun êlan klông dôk ngă “Bi kpăk” phung duh bi liê truh ti Gia Lai. Hluê si Nguyễn Thị Thanh Lịch, bruă duh bi liê ktuê êlan êran pral Pleiku – Qui Nhơn lehanăn êlan êran pral Dưr – Dhŭng nah Yŭ mâo boh tŭ yuôm hlăm bruă mkra, mđĭ kyar dŭm sang amĭ hŏng hnơ̆ng prŏng, dŭm wăl tuh tia mkra mjing lehanăn wăl ngă lŏ hma ba yua kdrăp mrâo. Mơ̆ng anăn, đru msir mghaih klei kơ bruă mă, mnuih mă bruă ti alŭ wăl. Bi hrô hŏng bruă nao truh kơ dŭm ƀuôn prŏng, wăl tuh tia mkra mjing prŏng čiăng tui duah bruă mă, hnư hrui wĭt amâo hơĭt, dŭm pluh êbâo čô mnuih ƀuôn sang lŏ mâo klei găl dưi mă bruă kjăp.

 “Leh dlăng dŭm klei čih mơ̆ng VOV hmei mgei ai tiê êdi. Hmei hưn mthâo leh klei čih anei hlăm dŭm êpul mdê mdê mơ̆ng Anôk kriê dlăng bruă, êpul mơ̆ng dŭm knơ̆ng, dhar bruă ti alŭ wăl. Hmei ƀuh leh klei blŭ mbĭt hŏng anôk bruă hâo hưn. Bruă sang čư̆ êa hmei mâo leh klei akâo mơh snăn anôk bruă hâo hưn ăt đru mbĭt mơh, hưn mthâo leh boh sĭt, klei čiăng ti dŭm anôk bi kƀĭn trông gưl dlông akâo kơ gưl dlông duh bi liê, ruh mtlaih klei gun kpăk kơ Lăn dap kngư kơ bruă êlan klông”.

 Lý Văn Thanh, ti să Dak Sôr, kdriêk Krông Knô čar Dak Nông brei thâo, bruă duh kơ anôk bruă êlan klông ară anei dôk êdu kƀah, dŭm mta mnơ̆ng lŏ hma, boh kroh dleh dưi ba čhĭ, hmăi truh kơ boh tŭ yuôm. Ayŏng Thanh lač, knŭk kna brei mđing kơ hdră duh bi liê kơ anôk bruă nah gŭ êlan krĭng ƀuôn sang, boh nik jing ktuê êlan êran pral čiăng Lăn dap kngư đĭ kyar.

 “Kluôm ala dôk mčhĭt m’uăt kơ bruă mkra êlan êran pral ƀiădah dŭm alŭ wăl Lăn dap kngư ăt dôk čang guôn. Mnuih ƀuôn sang Lăn dap kngư ya mnơ̆ng mâo, mâo lăn ala čăt jing, mâo kphê, durian, dŭm mta mnơ̆ng pla mâo boh tŭ yuôm; ƀiădah ya mnơ̆ng mnuih Lăn dap kngư dôk kƀah, kƀah êlan êran pral, kƀah ktuê êlan jăk găl čiăng găn êrô. Dlăng dŭm klei čih mơ̆ng VOV kơ êlan êran pral ti lăn dap kngư kâo ƀuh djŏ êdi. Đảng, Knŭk kna brei mđing hĭn kơ dŭm krĭng dleh dlan msĕ si Lăn dap kngư snăn kơh dưi đĭ kyar pral lehanăn hơĭt kjăp hĭn”./.