VOV4.Êđê - Ƀri wưng bi hdơr 97 thŭn hruê klei mrâo cách mạng Việt Nam, aguah mbruê 21/6, ti ƀuôn prŏng Ƀuôn Ama Thuôt, Êpul gơ̆ng klei mrâo čar Dak Lak mkŏ mjing knăm mđup brei klei pah mni “Bruă klei mrâo čar Dak Lak gưl tal 2 thŭn 2021”. Klei bi lông bruă klei mrâo čar Dak Lak thŭn anei mâo 155 klei čih mơ̆ng dŭm êpul čih klei mrâo, pô čih klei mrâo mơ̆ng dŭm anôk bruă klei mrâo ti čar leh anăn gưl dlông dôk ti alŭ wăl čar Dak Lak, nao hgŭm bi lông hlăm dŭm mta msĕ si mđung asăp, mđung rup, hră klei mrâo, klei mrâo điện tử leh anăn rup klei mrâo.

Êpul gơ̆ng klei mrâo čar Dak Lak hrŏng mă leh 52 klei čih mâo hnơ̆ng tŭ jăk čiăng mđup brei klei pah mni, mâo 4 klei pah mni ênoh A, 8 klei pah mni ênoh B, 18 klei pah mni ênoh C leh anăn dŭm klei pah mni mđĭ ai. Nguyễn Văn Phú, khua kiă kriê Êpul gơ̆ng klei mrâo čar Dak Lak brei thâo, dŭm klei čih hlăm klei bi lông thŭn anei mâo hnơ̆ng tŭ jăk, čih hưn klă sĭt bruă kđi čar, bruă duh mkra ala ƀuôn leh anăn dhar kreh ti čar Dak Lak. Boh nik thŭn anei VOV krĭng Lăn Dăp Kngư jing anôk bruă bi lông hŏng lu mta bruă klei mrâo leh anăn mâo mă 7 klei pah mni, hlăm anăn mâo 1 klei pah mni ênoh A, 1 klei pah mni ênoh B, 2 klei pah mni ênoh C.

Y-Ƀel pô mblang