Hruê 4/7/2023, Sang êa drao prŏng Xuyên Á Lăn Dap Kngư dưi rŭ mdơ̆ng ti kdriêk Čư̆ Jŭt, čar Dak Nông. Nguyễn Văn Châu, Khua sang êa drao Xuyên Á brei thâo, hơ̆k mơak hŏng klei jih ai tiê mơ̆ng khua gĭt gai čar Dak Nông, leh anăn ƀuh klei bi knăl jăk hlăm wăl duh mkra mnia blei ti čar, anôk bruă duh mkra pral bi mklă bi liê hlăm alŭ wăl anei.

“Ară anei hmei truh ti Dak Nông čiăng bi liê sa blư̆ dua 2 sang êa drao: tal sa jing sang êa drao ti ƀuôn prŏng Gia Nghiã, leh anăn tal dua jing ti kdriêk Čư̆ Jŭt. Snăn lŏ dlăng wĭt hdră nao bi liê ti dŭm čar, mta pral jing yuôm bhăn snăk. Bi čiăng pral snăn brei klă mngač, hưn mdah, jing msir mgaih nanao djăp mta bruă čiăng kơ phung duh bi liê mâo klei tŭ dưn pral hĭn.”

Ăt lač kơ klei mđing dlăng mơ̆ng khua gĭt gai čar Dak Nông hŏng anôk bruă duh mkra, Hồ Tuấn Dũng, K’iăng Khua Knơ̆ng bruă 471, brei thâo, dŭm klei gun kpăk mâo hlăm hdră bruă anôk bruă rŭ mdơ̆ng mkra mđĭ, pŏk mlar êlan mơ̆ng Êlan dơ̆ng prŏng mrô 14 truh ƀăng jang knông lăn Bu Prơ̆ng dưi msir mgaih pral, čiăng kơ hdră bruă dưi bi leh hnơ̆ng.

“Sitô hmô msĕ si grăp blư̆ mâo klei gun kpăk kơ bruă ruh mgaih anôk ala, kơ hdră msir mgaih hdră mnêč jing klei gun kpăk mkăn snăn dưi mđing dlăng gĭt gai bi jăk mơ̆ng dŭm anôk bruă, boh nik mơ̆ng anôk bruă kriê dlăng hdră bruă, mơ̆ng Khua gĭt gai čar čiăng msir mgaih pral klei gun kpăk, snăn kơh dưi djŏ hnơ̆ng leh anăn mâo klei tŭ dưn msĕ si ară anei.”

 Duh bi liê hlăm bruă dliê kmrơ̆ng ti kdriêk Dak Song mơ̆ng êbeh pluh thŭn êgao, Nguyễn Đức Hạnh, Knơ̆ng bruă mkra mjing mnơ̆ng hŏng kyâo MDF Bison Dak Nông, lač:

“Hlăm wưng 5 thŭn hŏng anei snăn bruă mđing dlăng mơ̆ng bruă sang čư̆ êa alŭ wăl, klei đru mơ̆ng dŭm anôk bruă djŏ tuôm, anôk bruă mâo klei dưi snăn hmei ƀuh jing găl ênưih. Snăn ară anei anôk bruă hmei pla leh dliê hlăm ênhă mâo čar čuăl mkă leh anăn ngă jăk bruă kriê dlăng răng mgang dliê.”

 Dŭm klei ksiêm dlăng mơ̆ng dŭm anôk bruă duh mkra brei ƀuh wăl duh bi liê mnia blei ti čar Dak Nông dưi mkra mđĭ lu. Klei anei dưi čih yap mơ̆ng klei đĭ kyar ti čar hlăm dŭm ênoh mrô mkă hlăm dŭm thŭn êgao. Klă klơ̆ng, ênoh mrô mkra mđĭ hră mơar (PAR Index) Dak Nông mơ̆ng knhal jih hră dăp anăn mrô 2018 gĭr đĭ tal 37/62 čar, ƀuôn prŏng kluôm ala thŭn 2022; ênoh mrô kơ klei ngă bruă mơ̆ng anôk bruă ngă hră mơar knŭk kna (SIPAS) dăp tal 31/63 (đĭ 16 mkă hŏng thŭn 2021); ênoh mrô klei dưi bi ktưn gưl čar (PCI) dăp tal 38/63 (đĭ 14 tal mkă hŏng 2021); ênoh mrô mkra mđĭ hră mơar hlăm bruă rŭ mdơ̆ng leh anăn mđĭ kyar bruă sang čư̆ êa điện tử, bruă sang čư̆ êa mrô dăp tal 9/63 čar, ƀuôn prŏng.

Êdah êdi hlăm dŭm ênoh mrô ƀuôn prŏng PCI thŭn 2022, Dak Nông mâo dŭm klei mkra mlih, msĕ si ênoh bi liê mmông dăp tal 6/63, klei klă mngač dăp tal 17/63, klei pral kdal mơ̆ng bruă sang čư̆ êa čar dăp tal 23/63 čar, ƀuôn prŏng.

Khădah snăn, hlue si Đậu Anh Tuấn, K’iăng Khua anôk bruă klei bhiăn Êpul hgŭm mnia blei leh anăn tuh tia Việt Nam (VCCI), anei jing bruă tal êlâo čiăng Dak Nông mkra mlih ktang hĭn wăl bi liê mnia blei, iêô jak bi liê. Kyua mkă hŏng dŭm čar nao êlâo, mdrŏng hĭn, lu klei găl đĭ kyar hĭn, snăn bruă mkra mlih hră mơar ti Dak Nông brei đĭ pral hĭn kơh dưi lŏ mbŏ kơ klei adôk awăt ti čar.

“Tơdah hlăm dŭm ênoh mrô PCI ti čar Dak Nông snăn mrâo knŏng mâo ênoh mrô bo liê wưng mmông jing dôk hlăm êpul mrô sa kluôm ala, adôk anăn ăt dôk ti krah leh anăn êdei. Kyua anăn Dak Nông lŏ gĭr hĭn hlăm dŭm mta bruă, msĕ si bruă ba čhĭ brei găl ênưih hĭn, klei kơ lăn ala brei ruh mgaih ktang hĭn, leh anăn klei klă mngač kpă ênô… snăn mâo lu hdră msir brei Dak Nông ngă hlăm wưng kơ anăp. Anôk mphŭn kčưm mơ̆ng Dak Nông năng ai amâo găl ênưih msĕ si dŭm alŭ wăl mkăn ôh, ƀiădah Dak Nông mâo klei čang hmăng, Dak Nông mâo hnơ̆ng trah dlăng leh anăn Dak Nông mâo klei gĭr ktưn prŏng, kyua anăn čang hmăng mâo klei mlih mrâo hlăm dŭm thŭn êgao jing knhuang tal êlâo, leh anăn klei mlih mrâo hlăm wưng kơ anăp ñu klă sĭt hĭn, kjăp hĭn”./.