VOV4.Êđê - Knơ̆ng prăk tar rŏng lăn WB ti Việt Nam mkŏ mjing leh Knăm hưn mthâo kơ klei čih hdră duh mkra Việt Nam mlan 8 thŭn 2022 hŏng anăn “Mjuăt bi hriăm čiăng mđĭ kyar. Klei hưn anei lač kơ hdră duh mkra Việt Nam, ba mdah klei đăo knăl čang hmăng đĭ kyar hlăm wưng bhiâo lehanăn man dưn mơ̆ng hdră duh mkra ăt msĕ mơh klei dôk mâo hlăm ala čar lehanăn nah êngao djŏ tuôm kơ klei čang hmăng đĭ kyar mơ̆ng Việt Nam. Klei hưn bi mklă, hdră krŭ wĭt bruă duh mkra Việt Nam đĭ kyar pral hlăm 6 mlan êgao, kyua bruă mkra mjing lehanăn dŭm bruă nah tluôn krŭ wĭt pral. Kyua anăn, hluê WB, GDP dưi đăo knăl đĭ mơ̆ng 2,6% thŭn 2021 truh 7,5% thŭn 2022, klei prăk luič ênoh kah knar 3,8%. Ăt hluê WB, bruă mlih mrâo hdră mjuăt bi hriăm gưl prŏng jing kliăng čiăng mđĭ boh tŭ mơ̆ng Việt Nam lehanăn đru bi leh mta kñăm jing ala čar mâo hnư hrui wĭt kah knar man dưn hlăm thŭn 2035 lehanăn jing ala čar mâo hnư hrui wĭt đĭ hlăm thŭn 2045./.

H’Nêč pô mblang