VOV4.Êđê - Hruê mbruê 20/12, ti ƀuôn prŏng Ƀuôn Ama Thuôt, êpul phung thâo mbruă mă rup Việt Nam bi mguôp leh hŏng bruă sang čư êa čarb Dak Lak leh anăn êpul phung thâo mbruă Văn học čar Dak Lak mkŏ mjing klei rang mdah rup krĭng dhŭng kwar Krah leh anăn krĭng Lăn Dăp Kngư tal 26 thŭn 2021.

Klei răng mdah anei mâo 172 pŏk rup mơ̆ng phung thâo mbruă mă rup hriê mơ̆ng êpul thâo mbruă Văn học 10 čar, ƀuôn prŏng hlăm alŭ wăl mâo Đà Nẵng, Quảng Nam, Quảng Ngãi, Bình Định, Phú Yên, Khánh Hòa, Dak Lak, Dak Nông, Gia Lai leh anăn Kon Tum. Dŭm pŏk rup hưn mdah klă klơ̆ng kơ klei hdĭp, klei mă bruă knuă, gang mkhư̆ klei ruă tưp Covid-19 hlăm grăp alŭ wăl. Dŭm bruă mkŏ mkra, hruê knăm, klei ngă yang mâo knhuah gru dŭm djuê ana mnuih djuê ƀiă ăt dưi bi êdah klă siam. Klei răng mdah dưi mkŏ mjing ti sang kriê pioh hƀuê ênuk čar Dak Lak leh anăn jing sa hlăm dŭm bruă ngă tŭ drông hruê mkŏ mjing lĭng kahan yang ƀuôn Việt Nam, tŭ drông thŭn mrâo 2022.

Y-Ƀel pô mblang