VOV4.Êđê- Knăm bi hdơr kơ mnuih ƀuôn sang, knuă druh, lĭng kahan djiê leh kyua klei ruă tưp Covid-19 mơ̆ng dhar bruă gưl dlông mặt trận čar kwar Việt Nam leh anăn bruă sang čư êa ƀuôn prŏng Hồ Chí Minh bi mguôp, mkŏ mjing ti 8 mmông mmăt hruê anei hlăm 2 anôk bi kƀĭn Hà Nội leh anăn ƀuôn prŏng Hồ Chí Minh. Giăm 2 thŭn êgao, klei ruă tưp Covid-19 bluh đĭ ngă truh leh lu klei hmăi kjham kơ tar rŏng lăn, hlăm anăn mâo ala čar drei. Khădah mâo klei gĭr jih ai mơ̆ng Đảng, mnuih ƀuôn sang, lĭng kahan hŏng ai tiê bi mdrơ̆ng hŏng klei ruă tưp msĕ bi kdơ̆ng hŏng phung roh. Dưm klei suaih pral anak mnuih jing tal êlâo hĭn, ƀiădah kyua klei ruă tưp dleh dưi ksiêm dlăng, amâo lui kơ sa čô êrô. Êbeh 1 êklăk čô mnuih ƀuôn sang mâo klei ruă tưp Covid-19, mă leh klei hdĭp êbeh 23 êbâo čô mnuih ƀuôn sang, knuă druh leh anăn lĭng kahan. Hlăm brô 8 mmông krah mlam anei, ti ƀuôn prŏng Hồ Chí Minh, Hà Nội srăng hrăm mbĭt mkŏ mjing bruă čuh pui diăn, brui mgưi, pui phiơr. Dŭm anôk bruă klei đăo knang srăng tông tiêng liêng, dŭm boh hô̆ pui hlăm dŭm mnuôr êa ti ƀuôn prŏng Hồ Chí Minh srăng ktĭt koi, hlăm lu anôk, mnuih ƀuôn sang srăng mdjiê pui, čuh pui diăn ngă klei bi hdơr.

Pô mblang: Y-Ƀel Êban