VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19, Lâm Đồng brei phung knuă druh lehanăn mnuih mă bruă ti dŭm knơ̆ng, dhar bruă, alŭ wăl hlăm čar hluê ngă hdră ksiêm dlăng kman 3 hruê/blư̆. Hruê 23/11, čar Lâm Đồng lŏ mâo 171 čô djŏ klei ruă Covid 19 mrâo, mđĭ ênoh mnuih ruă hlăm čar truh 2.154 čô. Ênoh mnuih ruă đĭ lu leh čar bi êdu dŭm asăp bi ktlah yang ƀuôn. Hluê si klei bi mklă mơ̆ng Anôk bruă sang čư̆ êa čar Lâm Đồng, mta phŭn ngă kơ mnuih ruă Covid 19 đĭ lu jing wưng anei mâo lu mnuih mơ̆ng dŭm čar, ƀuôn prŏng dôk bluh mâo klei ruă nao ti Lâm Đồng ngă bluh mâo klei ruă, huĭ srăng bluh mâo ti lu anôk.

Čiăng hluê ngă jăk “Mta kñăm mdua” gang mkhư̆ klei ruă tưp tŭ dưn, rơ̆ng kjăp klei suaih pral mnuih ƀuôn sang lehanăn mđĭ kyar bruă duh mkra – ala ƀuôn. Anôk bruă sang čư̆ êa čar Lâm Đồng gĭt gai dŭm anôk bruă, êpul êya hlăm čar hluê ngă hdră ksiêm dlăng kman pral kơ phung knuă druh, mnuih mă bruă 3 hruê/blư̆. Mbĭt anăn, mtă kơ dŭm êpul êya bruă, mnuih nao ngă bruă amâo dah ngă hră m’ar ti dŭm anôk bruă brei mâo hră bi mklă tlŏ leh ênŭm aruăt vaccine lehanăn amâo mâo kman klei ruă djŏ si klei kčah mtrŭn./.

                                                    Pô mblang: H’Nêč Êñuôl