VOV4.Êđê- K’iăng khua knŭk kna Vũ Đức Đam siñê bi mklă leh mta kñăm, bruă klam, hdră msir mđĭ kyar dŭm hră klei mrâo čih lehanăn hră klei mrâo điện tử bruă hŏng ala tač êngao mơ̆ng lăn čar wưng thŭn 2022 – 2030. Mta kñăm mđĭ kyar hră klei mrâo Việt Nam News, hră klei mrâo Rup Việt Nam lehanăn Hră klei mrâo Điện tử VietnamPlus mơ̆ng Thông tấn xã Việt Nam jing hră klei mrâo čih lehanăn hră klei mrâo điện tử bruă hŏng ala tač êngao mơ̆ng lăn čar, bi leh jăk bruă klam hâo hưn hŏng tač êngao hluê djŏ hdră êlan mtrŭn mơ̆ng Đảng, hdră bhiăn mơ̆ng knŭk kna drei. Bruă klam lehanăn hdră msir mđĭ kyar hră klei mrâo čih lehanăn hră klei mrâo điện tử bruă hŏng ala tač êngao mơ̆ng lăn čar wưng thŭn 2022-2030 jing mđĭ hnơ̆ng tŭ jăk klei hâo hưn. Klă klơ̆ng mđĭ hnơ̆ng lehanăn klei tŭ jăk hlăm bruă hâo hưn bruă hŏng tač êngao, pral kdal kơ hdră mđĭ kyar lăn čar lehanăn anak mnuih Việt Nam. Amâo mdei mlih mrâo kơ boh phŭn hâo hưn, mđĭ hnơ̆ng tŭ klei hâo hưn. Mkra mjing hră klei mrâo hŏng lu mta klei hluê hdră êlan bruă klei mrâo ênuk mrâo hluê kdrăp mrô, mkăp klei hâo hưn hlăm hla pŏk web yang ƀuôn kñăm jak iêu lu phung tui ksiêm dlăng./.

                                                    Pô mblang: H’Nêč Êñuôl