VOV4.Êđê-  Čar Kon Tum mđing mđĭ boh tŭ dưn hdră mă bruă mơ̆ng Êpul hgŭm bruă, êpul bruă; mđĭ boh tŭ dưn klei đru mguôp mơ̆ng krĭng bruă duh mkra êpul êya hlăm hdră mđĭ kyar bruă duh mkra, msir klei ư̆ êpa, bi hrŏ klei ƀun knap h’ĭt kjăp, mđĭ bruă klam, k’hưm mơ̆ng krĭng duh mkra êpul êya hlăm hdră duh mkra ară anei. Anei jing klei bi mklă mơ̆ng Anôk kiă kriê bruă Đảng čar Kon Tum ti Anôk bi kƀĭn ksiêm wĭt 20 thŭn hluê ngă Hdră mtrŭn 13 mơ̆ng Anôk kiă kriê bruă Đảng gưl dlông tal IX kơ bruă lŏ dơ̆ng mlih mrâo, mđĭ kyar, mđĭ boh tŭ bruă duh mkra êpul êya lehanăn 10 thŭn pŏk hluê ngă Hdră bhiăn êpul hgŭm bruă thŭn 2012 mkŏ mjing hruê 23/11, ti ƀuôn prŏng Kon Tum.

Kon Tum mđĭ lar bruă klam mơ̆ng Êpul hgŭm bruă hlăm hdră pla sâm Ngọc Linh ti gŭ êyui dliê

Leh 20 thŭn hluê ngă Hdră mtrŭn, truh ară anei čar Kon Tum mâo leh 194 Êpul hgŭm bruă hŏng êbeh 9.700 čô hgŭm lehanăn 210 êpul bruă hŏng giăm 2.200 čô hgŭm dôk ngă bruă. Hnư hrui wĭt kah knar mơ̆ng sa čô mnuih mă bruă hlăm Êpul hgŭm bruă mâo hlăm brô 41 êklăk prăk/thŭn.

 Gru hmô mkra mjing kphê doh mơ̆ng sa Êpul hgŭm bruă ti kdriêk Đăk Hà, čar Kon Tum

Anôk kiă kriê bruă Đảng čar Kon Tum bi mklă, lŏ dơ̆ng mđĭ boh tŭ hdră mă bruă mơ̆ng Êpul hgŭm bruă, êpul bruă, mđĭ boh tŭ klei đru mguôp mơ̆ng hdră duh mkra êpul êya hlăm hdră mđĭ kyar bruă duh mkra, msir klei ư̆ êpa, bi hrŏ klei ƀun knap h’ĭt kjăp, mđĭ bruă klam, k’hưm mơ̆ng krĭng duh mkra êpul êya hlăm hdră duh mkra ară anei./.

Pô mblang: H’Nêč Êñuôl