VOV4.Êđê - Hlăm wưng êgao, kyua adiê hjan prŏng mâo sui ngă kơ lu anôk dôk ngă bruă hlăm Hdră mkra mđĭ dŭm ktuê êlan jhat rai hlăm Êlan dơ̆ng prŏng mrô 24 kdrêč nao găn kdriêk Kon Plŏng, čar Kon Tum klưh hroh kjham. Ti anăp klei anei, Anôk kriê dlăng lehanăn êpul ngă mkra hdră bruă dôk mjêč msir mghaih kñăm rơ̆ng kjăp klei êđăp ênang êlan klông, mbĭt anăn lŏ mtrŭt mđĭ pral hdră hluê ngă dŭm bruă hlăk gun kpăk kyua hmăi mơ̆ng gưl adiê hjan êa lip.

Klei ksiêm dlăng mơ̆ng Anôk kiă kriê hdră ngă mkra êlan klông alŭ wăl Kon Tum ti ktuê êlan dơ̆ng mrô 24 brei ƀuh, hlăm hdră ngă mkra hdră bruă mrô 4 lehanăn 5 dlông 24 km găn alŭ wăl kdriêk Kon Plŏng mâo 6 anôk klưh hroh hŏng ênoh luič liê đăo tĭng truh hlăm brô 10 êklai prăk. Knơ̆ng bruă Êlan klông dŭ mdiăng čar Kon Tum brei thâo, mbĭt hŏng klei gĭt gai dŭm êpul ngă bruă huai mdoh lăn, boh tâo čiăng rơ̆ng klei găn êrô ti ktuê êlan mrô 24, êpul bruă ăt bi mklă prăk bi liê kñăm msir mghaih klei anei, mbĭt anăn akâo kơ Phŭn bruă êlan klông dŭ mdiăng bi mlih hdră mkra taluy ti dŭm anôk čiăng kơ hdră anei rơ̆ng klei kjăp hĭn./.

H’Nêč pô mblang