Knăm mơak OCOP krĭng Ngŏ Dưr mơak mñai hŏng êbeh 250 knưng mnơ̆ng, mdah dŭm mta Mnơ̆ng dhơ̆ng OCOP leh anăn mnơ̆ng lŏ hma, kan hdang čar Quảng Ninh leh anăn lu čar, ƀuôn prŏng hlăm kluôm ala. Khăp dlăng ti dŭm knưng mnơ̆ng, amai Mai  Chi brei thâo:

"Grăp blư̆ mâo knăm mơak snăn kâo ƀuh hnơ̆ng jăk, rup mnơ̆ng dhơ̆ng mâo lu, mnơ̆ng lu jơr, lu knưng mnơ̆ng rơ̆ng hnơ̆ng jăk hĭn.”

Ăt mâo sa klei mĭn hŏng amai Mai Chi, ayŏng Lê Thế Trung, brei thâo: ară anei hlăm dŭm anôk sang mnia mâo nanao hdră, knư mnơ̆ng, anôk dưm mnơ̆ng dhơ̆ng OCOP, mơ̆ng djam tam, hbei, boh kroh, mnơ̆ng ƀơ̆ng truh kơ mnơ̆ng yuan grăp hruê mâo phŭn agha klă mngač mâo mrô QR..., kyua anăn phung blei yua hơĭt ai tiê ruah blei:

"Êlâo dih, mơ̆ng mnơ̆ng dhơ̆ng yua aguah tlam truh kơ mnơ̆ng dhơ̆ng kdrăp mrâo, sang kâo khăng blei mnơ̆ng mơ̆ng ala tač êngao. Araw anei anôk ba čhĭ mâo Mnơ̆ng dhơ̆ng OCOP mkra mjing hlăm ala čar mâo ênoh djŏ guôp, hnơ̆ng jăk dưi mđĭ leh anăn phŭn agha klă mngač anăn kâo blei. Boh nik mnơ̆ng dhơ̆ng Mnơ̆ng dhơ̆ng yua aguah tlam hơĭt ai tiê blei čiăng duh kơ klei čiăng yua hlăm gŏ sang.”

Mơ̆ng leh pŏk ngă klei mtrŭt mjhar mnuih Việt Nam mđing yua mnơ̆ng Việt Nam, truh ară anei, Mnơ̆ng dhơ̆ng OCOP mâo lu phung blei yua hŏng klei gĭr mđĭ hnơ̆ng jăk, rup. Mnơ̆ng dhơ̆ng OCOP mâo leh hlăm lu anôk ba čhĭ điêt prŏng leh anăn lu anôk čhĭ mnơ̆ng. Mđĭ kyar Mnơ̆ng dhơ̆ng OCOP amâo djŏ knŏng mđĭ hnơ̆ng jăk, rup, hră bi mklă phŭn agha ôh ƀiădah lŏ đru kơ grăp čô mnuih ƀuôn sang, gŏ êsei mnia blei mâo thiăm klei thâo, bruă klam hŏng djăp mta mnơ̆ng dhơ̆ng ba čhĭ. Mơ̆ng anăn bi mlih klei mĭn bruă lŏ hma jing klei mĭn pioh ba čhĭ mnơ̆ng dhơ̆ng, ñŭ kma hŏng dlông rŏng lăn.

 Êpul hgŭm bruă Măng Đen Forest, kdriêk Kon Plông, čar Kon Tum jing sa klei bi hmô êdah êdi kơ bruă mđĭ hnơ̆ng Mnơ̆ng dhơ̆ng OCOP, mkŏ mjingg anăn knăl mnơ̆ng dhơ̆ng mdê hjăn ti alŭ wăl. Grăp thŭn, êpul hgŭm bruă mkra mjing êb eh 100 ton kphê arabica. 5 mta Mnơ̆ng dhơ̆ng kphê mkra mjing mkăn bi mklă OCOP 3 truh 4 mtŭ ăt dôk ba čhĭ lu snăk hlăm ala čar. Ayŏng Lê Nhật Tiến,  K’iăng Khua Êpul hgŭm bruă, brei thâo:

 "Hdră OCOP jăk snăk hlăm klei đru kơ Êpul hgŭm bruă thâo tă hdră mnơ̆ng dhơ̆ng mơ̆ng tal êlâo truh kơ anôk ba čhĭ čiăng kơ mnơ̆ng dhơ̆ng jăk hĭn. Êngao kơ 25 ha Êpul hgŭm bruă dôk pla mrâo leh anăn kriê dlăng, snăn hmei dôk pŏk mlar krĭng pla mjing, êlâo hĭn jing bi siñê klei kuôl kă hŏng grăp gŏ êsei ƀuăn rơ̆ng anôk ba čhĭ kơ mnuih ƀuôn sang.”

 Lê Thùy Kim Loan, Khua Knơ̆ng bruă Pyloherb, anôk bruă mâo 15 mnơ̆ng dhơ̆ng anăn knăl OCOP ti čar Kon Tum hlăm bruă êa drao, brei thâo:

"OCOP jing hră bi mklă mơ̆ng Mnơ̆ng dhơ̆ng mâo klei mdê hjăn mơ̆ng krĭng kwar lu snăk. Pô păn kjăp hlăm klei bi mklă OCOP snăn pô srăng ƀuh mnơ̆ng dhơ̆ng pô mâo klei mdê hjăn. Hjăn tem OCOP dưi mkăp ti čar jiă kma mta mnơ̆ng mdê hjăn leh.”

Hlue si nai prĭn Nguyễn Ngọc Tuyên,  Khua Anôk bruă duh mkra leh anăn kriê dlăng Lăn Dap Kngư, tơdah mâo hră bi mklă OCOP jing mkŏ mjing leh anăn knăl leh anăn phung blei yua thâo. Kyua anăn, dŭm anôk bruă duh mkra amâo mdei bi mlih klei mĭn mkra mjing leh anăn čhĭ mnơ̆ng dhơ̆ng hlăm ênuk kdrăp mrâo:

"Bruă dưm mnơ̆ng dhơ̆ng OCOP knŏng jing hră mơar yua amâo djŏ jing anăn knăl ôh, ƀiădah anăn knăl brei jing klei đăo knang mơ̆ng phung yua. Tơdah mâo hră mơar snăn brei mâo mbĭt hhŏng klei hưn mdah hnơ̆ng jăk čiăng bi mklă anăn knăl pô snăn hlăk anăn mnơ̆ng dhơ̆ng srăng dưi mđĭ hnơ̆ng. Êngao anăn, yua jih klei găl tur knơ̆ng kdrăp mrâo čiăng ngă jăk hĭn hlăn wưng ară anei.”

Boh tŭ ba mơ̆ng Hdră bruă OCOP đru kơrŭ wĭt klei găl, klei mâo mơ̆ng dŭm mnơ̆ng dhơ̆ng alŭ wăl, đru lŏ mkra wĭt bruă lŏ hma mguôp hŏng mđĭ kyar bruă mkra mjing hnơ̆ng điêt leh anăn hiu čhưn ênguê krĭng ƀuôn sang. Klei đăo knang mơ̆ng phung blei yua hŏng mnơ̆ng dhơ̆ng OCOP Việt brei ƀuh Mnơ̆ng dhơ̆ng Việt Nam ƀrư̆ hruê mâo hlăm anôk ba čhĭ hlăm ala čar, đru mđĭ bruă duh mkra đĭ kyar./.