VOV4.Êđê- Aguah mbruê 6/12, ti sang bruă kƀĭn ala, dhar bruă Yang ƀuôn mơ̆ng bruă kƀĭn ala mkŏ mjing leh klei kƀĭn kluôm tal 5 čiăng ksiêm dlăng hră hưn mdah mơ̆ng knŭk kna kơ đa đa hdră êlan, hdră kñăm, boh sĭt bruă gang mkhư̆ klei ruă tưp Covid-19. K’iăng khua bruă kƀĭn ala Trần Thanh Mẫn nao hgŭm hlăm klei kƀĭn anăn. Ksiêm dlăng hră hưn mdah mơ̆ng knŭk kna, phung bi ala mñă brei bi klă hdră bhiăn kơ mnuih ngă bruă tlŏ mgang, ksiêm mkă kman, kriê dlăng mnuih mâo klei ruă tưp Covid-19. Hlăm klei kƀĭn, K’iăng khua bruă kƀĭn ala Trần Thanh Mẫn mtă brei lŏ bi klă dŭm klei ngă soh bi mlih mơ̆ng hdră mtrŭn knŏng kñăm dŭm hdră êlan, hdră kñăm, boh sĭt gang mkhư̆ klei ruă tưp Covid-19 mdê hŏng klei bhiăn ala čar amâodah klei bhiăn ară anei ka bi klă. Lŏ ksiêm dlăng klei êđăp ênang dŭm hdră êlan dưi bi êdah leh hlăm hdră mtrŭn čiăng hưn mdah hŏng dhar bruă gĭt gai bruă kƀĭn ala.

Pô mblang: Y-Ƀel Êban