VOV4.Êđê- Aguah hruê 1/12, ti dŭm čar kwar Krah adiê hjan hrŏ leh, hnơ̆ng êa ti dŭm hnoh krông hlăk trŭn. Adiê hjan ngă êngăp êa hlăm ênhă prŏng, 9 čô djiê. Bruă knŭk kna dŭm alŭ wăl đru leh kơ mnuih ƀuôn sang mjêč msir mghaih klei truh. Ti kdriêk krĭng čư̆ čhiăng Dhŭng Trà My, čar Quảng Nam, adiê hjan prŏng dŭm hruê êgao ngă klưh lăn ti lu anôk. Êpul bruă djŏ tuôm mbĭt hŏng mnuih ƀuôn sang hlăk dôk mđing msir mghaih čiăng kơ mnuih ƀuôn sang lehanăn êdeh êdâo lŏ dưi găn êrô. Adiê hjan ti čar Bình Định ngă leh 3 čô djiê, 2 čô êka, êbeh 31 êbâo boh sang êngăp êa, 1.250 drei mnơ̆ng rông êa kpuh mđung. Ară anei, anôk bruă êlan klông čar anei dôk ba êpul nao mkra dŭm ktuê êlan jhat rai. Adiê hjan ti Phú Yên ăt ngă 6 čô djiê. Adiê hjan prŏng mbĭt hŏng phŭn pui kmlă pŏk phai êa ngă êbeh 28 êbâo gŏ sang ti dŭm kdriêk Tuy An, Phú Hòa, Đồng Xuân lehanăn ƀuôn prŏng Tuy Hòa êa lip./.

Pô mblang: H’Nêč Êñuôl