VOV4.Êđê- Yang hrue dơ̆ng mbruê 19/11, anôk bruă djŏ tuôm kdriêk Lâm Hà čar Lâm Đồng lŏ ƀuh leh anăn ba sa čô êkei mâo klei ruă tưp Covid-19 wĭt kơ anôk bi ktlah, mdrao mgŭn leh sa hruê tlĕ đuĕ. Pô anei jing C.P dôk ti să Phước Chính, kdriêk Bắc Ái, čar Ninh Thuận. Êlâo kơ anăn, hlăk hruê 16/11, pô anei đĭ êdeh p’phŭt nao ti kdriêk Lâm Hà ngă bruă pĕ kphê mưn. Anôk bruă djŏ tuôm mă mta ksiêm mkă kman pral kơ pô anei leh anăn ba ksiêm mkă hŏng kdrăp PCR ƀuh mâo klei ruă tưp Covid-19 leh anăn dưi ba nao mdrao ti anôk bi ktlah, mdrao mgŭn kơ mnuih mâo klei ruă tưp Covid-19 ti să Tân Văn, kdriêk Lâm Hà.

Truh kơ tlam hruê 18/11. Pô anei tlĕ đuê̆ mơ̆ng anôk mdrao mgŭn. Leh hmao ƀuh klei anei, kdriêk Lâm Hà ngă leh bruă tui duah. Leh sa hruê gĭr ktưn tui duah, yang hruê dơ̆ng hruê mbruê 19/11. Anôk bruă ngă bruă hmao ƀuh pô anei anei dôk đuê̆ dăp ti dlông ana kyâo prŏng. Leh anăn pô bi ala bruă sang čư êa ngă klei mtô mblang, dưi lŏ ba wĭt pô anei kơ anôk mdrao mgŭn.

Pô mblang: Y-Ƀel Êban