VOV4.Êđê-Tui ngă hdră mkăp pla sa êklai phŭn ana kyâo mtah wưng thŭn 2021 -2025 mâo leh klei bi klă mơ̆ng Khua knŭk kna, čar Lâm Đồng dôk mkŏ mjing hdră êlan leh anăn ngă bruă pla 50 êklăk phŭn ana kyâo mtah hlăm alŭ wăl. Čar Lâm Đồng ară anei mâo giăm 454 êbâo 900 ha dliê hrông leh anăn 83 êbâo 850 ha dliê pla, mâo hnơ̆ng guôm êyui jing 55%, hrŏ 7% mkă hŏng 10 thŭn êlâo.

Čiang mđĭ hnơ̆ng guôm êyui mơ̆ng dliê, bi djŏ guôp hŏng klei mlih yan adiê leh anăn rơ̆ng kơ wăl mnơ̆ng hdĭp, hlăm thŭn 2021, čar Lâm Đồng lŏ pla thiăm 490 ha dliê hlăm dŭm anôk lăn hŏng leh anăn lăn lŏ rui mă kyua klei mmiă yua soh hdră bhiăn. Mbĭt hŏng anăn, čar Lâm Đồng dôk ngă hmar bruă pla 50 êklăk phŭn kyâo mtah hluê si hdră mkăp pla sa êklai phŭn ana kyâo mtah wưng thŭn 2021 -2025 mâo leh klei bi klă mơ̆ng Khua knŭk kna. Truh kơ ară anei, 4 êklăk 84 êbâo phŭn kyâo mtă dŭm mta dưi pla leh hlăm dŭm kdriêk, ƀuôn prŏng hlăm čar Lâm Đồng.

Pô mblang: Y-Ƀel Êban