VOV4.Êđê - Ti ƀuôn prŏng Ƀuôn Ama Thuôt, Anôk bruă mtrŭt mjhar lŏ hma- ana mjeh pla mjing, mnơ̆ng rông leh anăn kan dang čar Dak Lak bi hgŭm hŏng Anôk bruă mtrŭt mjhar lŏ hma ala čar mkŏ mjing ksiêm wĭt Hdră bruă “Mkŏ mjing leh anăn mđĭ kyar gru hmô pla pluă dŭm mta ana boh kroh hlăm đang kphê krĭng Lăn Dap Kngư” wưng thŭn 2019-2021, hlue ngă ti 4 čar Lăn Dap Kngư, mâo Dak Lak, Dak Nông, Gia Lai leh anăn Lâm Đồng, hŏng 115 ha pla pluă boh ƀơr leh anăn durian hlăm đang kphê.

Hjăn ti Dak Lak, hlăm 3 thŭn (2019-2021), bruă mkŏ mjing leh 55 ha pla pluă ti dŭm kdriêk Čư̆ M’Gar, Krông Ƀuk, Krông H’Nang, Ea H’leo lehanăn wăl krah Ƀuôn Hồ, hŏng 55 gŏ êsei mnuih ƀuôn sang hgŭm hlăm Hdră anei đru kơ gru hmô 70% kơ mjeh leh anăn hbâo pruê, mkŏ mjing dŭm boh adŭ hriăm mjuăt, kreh knhâo hdră mnêč ktrâo lač kơ dŭm gŏ êsei mnuih ƀuôn sang hgŭm. Mĭn tĭng, leh ana boh kroh hlăm wưng mboh srăng mâo prăk hui wĭt 20% mkă hŏng knŏng pla hjăn kphê, bi hrŏ klei luič liê sĭt ênoh boh mnga lŏ hma mâo klei bi mlih msĕ si ară anei.

H’Zawut pô mblang