VOV4.Êđê- Thŭn 2021 hŏng lu klei dleh dlan hŏng klei jhat mơ̆ng klei ruă Covid-19 hlăk ƀrư̆ êgao, ƀiădah hŏng phung lĭng kahan leh anăn mnuih ƀuôn sang krĭng mâo klei ruă tưp, anăn jing sa thŭn jiă klei khăp lĭng kahan hŏng ƀuôn sang, klei khăp hdơ̆ng ƀĭng kahan.

Knŏng dŭm mmông leh mâo asăp mtrŭn, sa boh sang êa drao jing jai mâo mkŏ mjing, sa anôk mkă dlăng kman mâo mkŏ mjing mơh; ka bŏ ôh sa hrue mlam, phung lĭng kahan pral mâo djă ba ênŭm kdrăp mă bruă ênuk mrâo mơ̆ng Hà Nội găn leh dŭm êbâo km truh kơ ƀuôn prŏng Hồ Chí Minh, lehanăn dŭm čar nah Dhŭng đru kơ dŭm alŭ wăl anăn, mdrơ̆ng hŏng klei ruă tưp. Anăn jing klei tiŏ nao lĭng kahan pral êdi êjai ênuk êđăp ênang mơ̆ng lĭng kahan awa Hồ ti anăp klei pia “Roh Covid 19”. Thượng tướng Võ Minh Lương, k’iăng khua Phŭn bruă lĭng kahan brei thâo:

“Hlăm boh klei msĕ snăn, lĭng kahan mâo mkŏ mjing leh truh 9 boh sang êa drao jing jai, mbĭt hŏng 175, mbĭt hŏng nai êa drao kahan kwar Ngŏ mkŏ mjing leh 2 bĭt anôk mdrao mnuih ruă Covid”.

Êjai dôk mdrao mgŭn jing sa klei lông dlăng mơh mơ̆ng mnuih ruă, êjai lu mnuih ruă mâo klei bi kdơ̆ng, hruič jih kdrăp mnơ̆ng mdrao mgŭn mơ̆ng asei mlei, blŭ ƀuah, truh čăm wăt phung aê mdrao lehanăn nai êa drao... Ƀiădah hŏng klei thâo săng, phung aê mdrao kahan ăt gĭr jih ai tiê mdrao mgŭn mnuih ruă. msĕ hŏng Thượng tá Vũ Đình Ân, ti anôk mdrao mnuih ruă covid:

"Mnuih ruă amâo lŏ dưi bi êwa ôh, bi kdjăt kƀla, kŏ dlô diñu mtŭk mtŭl kyua kƀah osi, tơdah pô ăt kăn thâo gĭr yap jing pô ngă soh, lehanăn boh mơ̆ng klei anăn, mnuih ruă srăng djiê”.

“Kreh ƀuh sa čô mnuih ruă snăn jih sa boh sang rŭng, hrue anei pô anei mgi pô mkăn. Ƀiădah anei hjăn pô dŭm gưl dleh bi êwa mơ̆ng mnuih ruă covid 19 jing huĭ hyưt êdi”.

Klei ruă tưp hlăk bluh đĭ ktang ti ƀuôn prŏng Hồ Chí Minh msĕ si ktur leh êlam hlăm ai tiê sa čô êkei êdam Dương Thanh Hoàng, mơ̆ng Anôk bruă kiă kriê kahan kdriêk čar mrô 7, knơ̆ng bruă kahan ƀuôn prŏng, lehanăn jih jang ƀĭng kahan nao ngă bruă: Đŭng hruôm asei atâo mnuih djiê kyua covid, mâo lu blư̆ mgei ai tiê amâo lŏ truh blŭ ôh. Digơ̆ găn jih klei ktrŏ hlăm klei mĭn, ai tiê, dŭm klei huĭ čiăng hrăm mbĭt hŏng ƀĭng kahan ba asei atâo mnuih djiê hŏng klei mdjĕ, čuh ba wĭt hbâo kơ găp djuê truh kơ grăp gŏ sang găp djuê digơ̆:

"Mmông lu mnuih hĭn mơ̆ng 10 – 15 čô/hrue, tăp năng hmei mâo wĭt truh kơ krah mlam, snăn lŏ hmư̆ asăp iêo, snăn lŏ nao mă bruă truh kơ aguah hrue êdei kơh mâo wĭt”.

Amâo mâo djŏ knŏng jing mnuih ngă bruă hlăm anôk huĭ hyưt hĭn ôh hŏng mta kman sar CoV 2, êpul lĭng kahan lŏ nao hlăm djăp anôk dôk bi ktlah, čiăng dlăng kriê klei suaih pral, duh kơ klei hdĭp phung ƀuôn sang, lehanăn nao răng mgang klei êđăp ênang yang ƀuôn. Lĭng kahan đĭ yua wăt êdeh p’phŭt, êdeh wai jơ̆ng hiu trŭt ba kdrăp mă bruă, mnơ̆ng mnuă truh kơ grăp boh sang êa drao, truh hlăm djăp anôk phung ƀuôn sang dôk. Phung lĭng kahan kbiă êa hŏ hang kyua adiê mđiă, lehanăn msah kyua hjan, ƀiădah jih jang dŭm anŭng êa drao kg braih, boh mnŭ, čăp djam ăt dôk hrông siam truh hŏng mnuih yua êjai dôk găn klei dleh dlan. Jih jang klei phung lĭng kahan gĭr ktĭr anăn mâo leh klei phung ƀuôn sang mpŭ mni:

"Kâo amâo mâo thâo blŭ ôh, knŏng thâo lač jăk đuič, kyua mâo phung lĭng kahan đru hŏng jih ai tiê msĕ snei, hmei amâo lŏ mâo klei blŭ mkăn ôh, knŏng lač jăk lu êdi”.

Bruă sang čư̆ êa alŭ wăl krĭng mâo klei ruă tưp bi myuôm êdi klei phung lĭng kahan mă bruă, diñu amâo mâo uêñ kơ klei dleh dlan, bi leh bruă knuă hŏng klei jăk. K’iăng khua bruă Đảng ƀuôn prŏng, Khua knơ̆ng bruă sang čư̆ êa ƀuôn prŏng Hồ Chí Minh Phan Văn Mãi brei thâo:

“Lĭng kahan amâo mâo djŏ knŏng bi blah tui si khua gĭt gai ôh, ƀiădah bi blah hŏng asăp mtrŭt mơ̆ng ai tiê pô, lĭng kahan truh hŏng phung ƀuôn sang êjai dôk hlăm klei dleh dlan, klei knap mñai, ruă duam, dôk ti anăp klei djiê, lehanăn đa đa amâo mâo myun hlăm găp djuê mâo hĕ mnuih djiê. Snăn kâo mĭn dah lač kơ hƀuê ênuk lĭng kahan, sĭt nik srăng mâo dŭm klei čih kơ klei kdrưh k’ăm kơ lĭng kahan đru leh phung ƀuôn sang mdrơ̆ng hŏng klei ruă tưp”.

Hlăm klei bi blah hŏng roh amâo mâo dưi thâo ƀuh jing kman klei ruă tưp Covid 19 giăm dua thŭn leh êgao, lŏ sa blư̆ dơ̆ng bi klă dŭm knhuah siam mơ̆ng lĭng kahan yang ƀuôn Việt Nam, anăn jing: “Khădah hlăm ya mta klei dleh dlan dôk găn, lĭng kahan awa Hô ăt ba akŏ nanao”. Hlăm djăp mta bruă ngă, hlăm djăp anôk knhuah mơ̆ng lĭng kahan awa Hô jing leh anôk phung ƀuôn sang knang kjăp êdi. Knŏng yap mă hlăm gưl klei ruă tưp bluh đĭ tal 4 đuič, Phŭn bruă lĭng kahan mâo tiŏ nao leh sa ênoh lĭng kahan prŏng êdi nao đru kơ ƀuôn prŏng Hồ Chí Minh lehanăn dŭm čar nah Dhŭng êbeh 130 êbâo čô kahan nao mdrơ̆ng hŏngklei ruă tưp Vocid 19./.

Pô mblang: Y-Khem Niê