VOV4.Êđê -  Čiăng dưi mâo djăp pui kmlă yua hlăm dŭm hrue akŏ thŭn mrâo lehanăn tết Nguyên Đán Nhâm Dần 2022, Êpul grŭp pui kmlă Việt Nam EVN mtă leh kơ dŭm êpul êya bruă ngă bruă hŏng jih ai tiê, amâo mâo khăt pui, amâo mâo ngă luič pui kmlă kơ mnuih yua, knŏng huĭdah mâo klei jhat đuič hlăm dŭm hrue akŏ thŭn mrâo mơ̆ng 0h krah mlam hrue 31/12/2021 truh jih hrue 3/1/2022, Tết Nguyên Đán Nhâm Dần 2022 mơ̆ng 0h hrue 30/1/2022 hlŏng truh jih hrue 3/2/2022. Mbĭt hŏng bruă kiă răng nanao klei kiă kriê, bi êran, mkra wĭt hrue lehanăn mlam hlăm dŭm hrue knăm, têt hat, EVN mtă kơ jih jang êpul êya bruă mprăp djăp ênŭm mnơ̆ng mnuă, kdrăp mă bruă, lehanăn êdeh êdâo kăp mghaih msir djăp mta klei amâo mâo jăk huĭdah mâo hŏng pui kmlă. Mđing kiă kriê, duh mĭn mđĭ ai kơ êpul ngă bruă hlăm dŭm hrue mdei akŏ thŭn, lehanăn Tết Nguyên Đán thŭn 2022. Êjai hlăm klei mă bruă, mđing kơ kơ bruă mdrơ̆ng hŏng klei ruă tưp, djŏ hŏng klei phŭn bruă mdrao mgŭn, lehanăn dŭm dhar bruă djŏ tuôm mtă mtăn kơ EVN./.

Y-Khem pô mblang