VOV4.Êđê- Tlam 8/12 ti Hà Nội, Êpul hgŭm ƀĭng ngă lŏ hma Việt Nam bi hgŭm hŏng Phŭn bruă lŏ hma leh anăn mđĭ kyar krĭng ƀuôn sang mkŏ mjing klei bi kƀĭn online bi siñê “Hdră bi hgŭm mđĭ ktang klei hâo hưn, mkŏ mjing krĭng ƀuôn sang mrâo mguôp hŏng bruă lŏ mkra mđĭ bruă lŏ hma wưng thŭn 2021-2025”. Blŭ hră, hlăm knăm bi siñê, Lương Quốc Đoàn, Khua Êpul hgŭm ƀĭng ngă lŏ hma Việt Nam mñă klă, hlăm klei bi hgŭm plah wah bruă lŏ hma - ƀĭng ngă lŏ hma- krĭng ƀuôn sang snăn ƀĭng ngă lŏ hma jing khua, jing anôk phŭn, krĭng ƀuôn sang jing tur knơ̆ng, bruă lŏ hma jing boh kdrĭt. Khua phŭn bruă lŏ hma leh anăn mđĭ kyar krĭng ƀuôn sang Lê Minh Hoan čang hmăng, brei thâo săng klă ai tiê klei mĭn ƀĭng ngă lŏ hma - boh phŭn mơ̆ng djăp hdră mkŏ mjing bruă duh mkra- ala ƀuôn; si bĕ ngă čiăng kơ ƀĭng ngă lŏ hma djăp klei găl čiăng gĭr ktưn kpưn đĭ kơ mdrŏng hlăm boh klei bruă lŏ hma bi mlih mơ̆ng bruă mkra mjing mâo leh jing mrâo mrang, klei anei brei mâo knuă druh bruă lŏ hma leh anăn phung hlăm êpul hgŭm bruă lŏ hma ti alŭ wăl bi hgŭm hluê ngă.

Pô mblang: H’Zawut Ƀuôn Yă