VOV4.Êđê - Phŭn bruă mdrao mgŭn mrâo mơĭt klei mtă kơ khua êpul gĭt gai bruă gang mkhư̆ klei ruă tưp Covid-19 leh anăn khua bruă sang čư êa dŭm čar, ƀuôn prŏng kơ bruă mđĭ hĭn dŭm hdră êlan gang mkhư̆ klei ruă tưp Covid-19 ti anăp kman mlih mrâo Omicron. Ti ala čar Việt Nam mâo leh dŭm čô mâo klei ruă tưp mơ̆ng kman Omicron hlăm 3 krĭng kwar jing phung hriê mơ̆ng ala tač êngao, mâo leh klei ksiêm dlăng leh anăn hmao bi ktlah. Hlăm wưng kman mlih mrâo Omicron dưi mŭt leh anăn tưp lar pral hlăm ala čar, phŭn bruă mdrao mgŭn mtă kơ dŭm čar, ƀuôn prŏng gĭt gai ktang phĭt, mđĭ hĭn dŭm hdră êlan gang mkhư̆ klei ruă tưp Covid-19, čŏng gang mkhư̆ kman mlih mrâo Omicron, mkŏ mjing dŭm hdră mkăp, hdră êlan djŏ hŏng boh sĭt klei ruă tưp Covid-19 hlăm alŭ wăl. Mđĭ hĭn klei thâo bruă mdrao mgŭn hŏng hdră 4 sa anôk, mđĭ bruă ksiêm dlăng phung mrâo wĭt, hriê mơ̆ng ala tač êngao. Dŭm alŭ wăl čiăng mđĭ hĭn bruă hâo hưn kơ mnuih ƀuôn sang brei răng ti anăp kman Omicron, amâo bi dôk lu mnuih tơdah amâo năng.

Y-Ƀel pô mblang