VOV4.Êđê - Knơ̆ng gĭt gai kahan êa leh anăn êpul mnuih mă bruă Việt Nam mrâo bi klă hdră êlan bi mguôp bruă hâo hưn klei bhiăn êa ksĭ, plao ksĭ wưng thŭn 2021-2026. Dŭm thŭn êgao, êpul hgŭm mnuih mă bruă Việt Nam leh anăn Knơ̆ng gĭt gai kahan êa bi mguôp mkŏ mjing leh lu hdră mâo klei yuôm bhăn, klă klơ̆ng mđing truh kơ krĭng ksĭ, plao ksĭ ala čar, ngă nanao bruă nao čuă, mđĭ ai phung lĭng kahan, knuă druh leh anăn mnuih ƀuôn sang ti plao ksĭ Trường Sa. Êpul hgŭm mnuih mă bruă mtrŭt mjhar phung đoàn viên, mnuih mă bruă đru mguôp hlăm keh krĭng ksĭ, plao ksĭ ala čar. Mđup brei kơ phung knuă druh, lĭng kahan ti plao ksĭ Trường Sa msĕ klei bi hmô bi mguôp dŭm gưl mnuih mă bruă hŏng kahan êa Việt Nam. Hdră bi mguôp wưng thŭn 2021 -2026 mâo 6 mta phŭn. Hlăm anăn knăm kơ dŭm bruă djŏ tuôm ti krĭng ksĭ, plao ksĭ Việt Nam, mtrŭt mjhar hdră jih jang mnuih ƀuôn sang leh anăn mnuih ƀuôn sang dôk ti ala tač êngao, mđing truh kơ lĭng kahan, mnuih ƀuôn sang kdriêk plao ksĭ Trường Sa leh anăn sang pra DK1…

Y -Bel pô mblang