VOV4.Êđê- Ti kdriêk Êa Hleo, čar Dak Lak, anôk bruă mtô bi hriăm pŏk ngă leh hdră mtô bi hriăm klă anăp lehanăn online kñăm rơ̆ng kjăp hdră mtô bi hriăm kơ phung hđeh ti anăp klei ruă tưp Covid 19 dôk bluh mâo dleh dưi ksiêm dlăng.

Êbeh sa hruê kăm anei, leh klei ruă tưp Covid-19 dưi ktuê dlăng, Sang hră gưl sa Ea Hleo, kdriêk Ea Hleo pral mkŏ mjing brei hđeh sang hră lŏ nao hriăm. Nai Nguyễn Văn Tân, Khua sang hră brei thâo, ară anei sang heă mâo 16 adŭ hŏng 523 hđeh sang hră, hlăm anăn hđeh sang hră mnuih djuê ƀiă mâo 216 čô.

“Čiăng rơ̆ng kơ bruă mtô bi hriăm, êđăp ênang kơ phung hđeh, sang hră ăt kčĕ hŏng dŭm gưl bruă krih êa drao mdjiê kman, kih mdoh, mprăp êa rao kngan. Sang hră mkŏ mjing mbha adŭ čiăng rơ̆ng ênoh hđeh hriăm ti gŭ 30 čô sa boh adŭ. Sang hră kčĕ hŏng dŭm gưl tlŏ ênŭm vaccin kơ phung knuă druh, mnuih mă bruă, Kơ ênoh phung hđeh mdei êjai nao sang hră kyua phung hđeh bi ktlah hjăn snăn sang hră dăp hdră mtô bi hriăm kơ phung hđeh hŏng hdră jao klei hriăm".

Sang hră gưl sa Ea Hleo lŏ wĭt hriăm ti sang hră

Adei Nguyễn Phạm Bảo An, hđeh adŭ 5A, sang hră gưl sa Ea Hleo mơak snăk kyua dưi lŏ wĭt kơ sang hră leh sa wưng bi ktlah hjăn kyua klei ruă tưp.

“Leh nao sang hră kâo ƀuh mơak snăk kyua dưi bi tuôm hŏng ƀĭng găp leh anăn phung nai. Hlăk hriăm ti sang snăn dŭm klei hriăm dleh, kâo amâo dưi êmuh nai ôh ƀiădah čih hlăm zalo čiăng êmuh. Bi hriăm ti sang hră snăn nai dưi  mblang kơ kâo mtam”

 Mbruă dŭm hdră mtô bi hriăm leh anăn hriăm hlăm sang hră - online, jao klei hriăm… tui hluê si boh klei ruă tưp mâo dŭm sang hră ti kdriêk Ea Hleo, čar Dak Lak hluê ngă jăk. Nai Nguyễn Thị Minh Trường,  K’iăng Khua sang hră gưl 1 Ea Khăl brei thâo: čiăng kơ bruă mtô bi hriăm online mâo klei tŭ dưn, sang hră duh bi liê leh hdră êlan pui dăng kông, mkŏ mjing hdră kčah mtô bi djŏ guôp; nai mprăp kleui hriăm hluê hdră mrâo, mă boh phŭn, jăk hĭn čoăng kơ phung hđeh thâo păn kjăp boh klei thâo. Giăm 500 čô hđeh sang hră, hlăm anăn mâo 210 čô hđeh mnuih djuê ƀiă ti sang hră gưl sa Ea Khăl, să Ea Khăl, kdriêk Ea Hleo mdrơ̆ng leh hŏng bruă hriăm online.

“Sang hră ăt mkŏ mjing hlei pô dưi hriăm online snăn brei phung hđeh hriăm online, phung hđeh ti giăm sang sa gưl hriăm ti adŭ anei dưi nao adŭ mkăn čiăng hriăm, năng ai mâo 2 čô, 3 čô sa boh maĭ. Phung hđeh amâo mâo klei dưi hriăm online snăn sang hră mkŏ mjing hdră hriăm online. Mâo phung hđeh mâo găp djuê mơ̆ng krĭng mkăn phung hđeh amâo dưi nao sang hră ôh, kăn dưi nao hriăm ti sang găp mơh, snăn phung nao nao jao klei hriăm ti sang kơ phung hđeh. Phung ti anôk bi ktlah hjăn phung nao amâo dưi nao ôh srăng jưh kơ bruă sang čư̆ êa alŭ wăl, êpul gang mkhư̆ klei ruă tưp Covid-19 êpul êya đru brei.

Mtô bi hriăm ti sang hră, dŭm boh sang hră brei rơ̆ng êđăp ênang, gang mkhư̆ klei ruă tưp

 Kdriêk Ea Hleo ară anei mâo 67 sang hră hŏng êbeh 29 êbâo čô hđeh sang hră mơ̆ng gưl hđeh truh kơ gưl 2. Phạm Văn Đảng, Pô mâo klei dưi ngă Khua adŭ bruă samg hră mtô bi hriăm kdriêk Ea Hleo brei thâo: Kyua klei ruă tưp ăt ka dưi ktuê dlăng, kluôm kdriêk mâo mkrah wah ênoh sang hră bi mlih nao hriăm ti sang hră. Bruă gang mkhư̆ klei ruă tưp dưi hyuă kjăp nanao ti sang hră. Dŭm sang hră khăng mkŏ mjing nanao bruă ktuê dlăng, ksiêm yap phung hđeh sang hră mâo găp djuê wĭt mơ̆ng krĭng mâo klei ruă tưp dôk bi ktlah ti sang čiăng mâo hdră hriăm djŏ guôp.

“Kơ tĭng adŭ mtô bi hriăm mâo leh hră mơar gĭt gai dŭm sang hră mkŏ mjing hdră kčah, klei mtô bi hriăm. Leh anăn grăp nai mtô brei bi mkŏ mjing hdră kčah mtô bi hriăm kơ adŭ pô, hlăm anăn mđing kơ hnơ̆ng jăk mtô bi hriăm kơ grăp êpul hđeh sang hră. Wăt tơdah hŏng ya hdră snăn klei thâo phŭn brei phung hđeh dưi păn, sĭt ksiêm dlăng klei hriăm snăn tăp hriăm ksiêm dlăng tăp năn mtam. Hnêč mnĭt mmông leh hđeh nao hriăm ti sang hră čiăng mkra mđĭ klei thâo phung hđeh hriăm online rơ̆ng hnơ̆ng jăk. Sĭt mâo bruă kơ F0 leh anăn ti krĭng anăn amâo dưi rơ̆ng êđăp ênang snăn phung hđeh hriăm online, jao klei ruă, Bi sĭt bi mlih jing krĭng amâo mâo mnuih ruă ƀuh êđăp ênang, dưi bi hriăm snăn  Anôk bruă gĭt gai să, khua sang hră hưn mthâo kơ phung hđeh nao hriăm.”

 Truh ară anei, ti kdriêk ea Hleo phung nai leh anăn hđeh sang hră amâo lŏ bi kngăr ôh hlăm bruă bi mlih dŭm hdră hriăm. Bruă mprăp kơ klei mtô bi hriăm online ăt msĕ si hriăm ti sang hră mơ̆ng dŭm sang hră dưi mkŏ mjing jăk, êđăp ênang hĭn đru kơ phung hđeh hmao hriăm klei hriăm.

Pô mblang: H’Zawut Ƀuôn Yă