VOV4.Êđê- Aguah 10/12, ti Sang êa drao kahan 175, Anôk bruă hâo hưn mtô mblang gưl dlông, Hră klei mrâo Đảng Cộng sản Việt Nam bi hgŭm mkŏ mjing Klei bi kƀĭn trông kreh knhâo “30 thŭn bi mguôp bruă mdrao mơ̆ng êpul kahan hŏng mnuih ƀuôn sang hlăm êa ksĭ, plao ksĭ” kñăm lač kơ dŭm klei yuôm bhăn, boh tŭ dưn mơ̆ng bruă anei hlăm 30 thŭn êgao, mă klei hriăm leh anăn kčĕ hdră msir čiăng mđĭ ktang, mđĭ lar bruă anei hlăm wưng kơ anăp. 30 thŭn êgao, hdră hluê ngă leh jăk bruă kriê dlăng, răng mgang klei suaih pral mnuih ƀuôn sang leh anăn êpul lĭng kahan hlăm êa ksĭ, plao ksĭ. Boh nik mkŏ mjing tŭ jing 5 gru hmô bi mguôp ngă bruă plah wah anôk bruă mdrao mgŭn kdriêk hŏng êpul bruă mdrao mơ̆ng kahan hlăm Anôk bruă gĭt gai lĭng kahan kdriêk. Êbeh 40 klei ksiêm hriăm hlăm klei kƀĭn trông bi mklă klei yuôm bhăn bruă kđi čar mơ̆ng bruă bi mguôp klei mdrao mơ̆ng êpul kahan hŏng mnuih ƀuôn sang hlăm êa ksĭ, plao ksĭ, bi mklă anei jing hdră êlan djŏ klă mơ̆ng Đảng, Knŭk kna, amâo djŏ knŏng đru mguôp kriê dlăng leh anăn mđĭ klei suaih pral kơ mnuih ƀuôn sang, lĭng kahan đuič ôh, ƀiădah lŏ yuôm bhăn hŏng bruă čung ba mnuih ƀuôn sang, mkra mđĭ bruă răng mgang klei êđăp ênang hlăm ala ƀuôn kñăm răng mgang kluôm ênŭm ala čar, klei dưi lăn čar.

Pô mblang: H’Zawut Ƀuôn Yă