VOV4.Êđê- Knơ̆ng bruă sang čư̆ êa ƀuôn prŏng Ƀuôn Ama Thuôt, čar Daklak mâo leh hră mtrŭn brei klei dưi ba yua dŭm hdră gang mkhư̆ klei ruă tưp Covid 19 hlăm ƀuôn prŏng. Hlue anăn, mơ̆ng 6h aguah hrue 6/1, knơ̆ng bruă sang čư̆ êa ƀuôn prŏng Ƀuôn Ama Thuôt srăng brei klei dưi mkŏ mjing jdăp mta bruă hlăm sang, hlăm tač, hŏng klei: Amâo mâo dưi bi kƀĭn êgao kơ 60 čô mnuih kơ dlông ôh, hlăm sa nôk, lehanăn êbeh 90% ênoh mnuih jing mâo tlŏ leh ênŭm dua aruăt vaccine, thâodah hlao leh mdrao klei ruă Covid 19 ka êgao ôh 6 mlan, hlue ngă ênŭm 5 mta klei mtă. Bi klei mkŏ mjing dơr djiê, thâodah bi kuôl ung mô̆ kăn jăk dưi rei mkŏ mjing lu mnuih, lehanăn mâo bruă sang čư̆ êa alŭ wăl kiă kriê. Lŏ brei pŏk jih jang dŭm êdeh êdâo dŭ mdiăng tue êlan sa hnơ̆ng mơ̆ng dŭm čar, lehanăn hlăm čar, êdeh buit, êdeh taxi, êdeh đĭ mưn hlue si klei kuôl kă, hiu čhưn dhing; dŭm anôk čhĭ mnia mnơ̆ng ƀơ̆ng huă lŏ wĭt pŏk ƀăng msĕ si aguah tlam, ƀiădah rơ̆ng hlue ngă djăp bruă răng mgang, mdrơ̆ng hŏng klei ruă tưp. Bi hlăm sang čhĭ mnơ̆ng ƀơ̆ng huă snăn amâo mâo dưi tŭ jum êgao kơ 20 čô mnuih hlăm sa blư̆. Bi klei hđeh lŏ wĭt nao sang hră mơar, hră mtrŭn anei brei mdei êjai jih jang bruă sang hră mơar hŏng hđeh sang hră hđeh điêt. Mkŏ mjing nao sang hră mơar kơ hđeh adŭ 9 lehanăn adŭ 12, yap mơ̆ng hrue 10/1/2022. Bi dŭm gưl 1; 2; 3 hlăm dŭm boh adŭ adôk mkŏ mjing hriăm online mơh./.

                        Pô mblang: Y-Khem Niê