VOV4.Êđê- Aguah hruê 7/12, ti Sang bi kƀĭn prŏng Ngọc Linh, ƀuôn prŏng Kon Tum, Êpul gơ̆ng bruă ƀuôn sang čar Kon Tum tal XII mphŭn pŏk Klei bi kƀĭn tal 2. Ti anôk bi kƀĭn, Êpul gơ̆ng bruă ƀuôn sang čar Kon Tum srăng ksiêm dlăng, bi trông lehanăn bi mklă lu bruă yuôm bhăn djŏ hŏng klei dưi. Hưn mdah mơ̆ng Anôk bruă sang čư̆ êa čar Kon Tum ti anôk bi kƀĭn brei ƀuh, khădah tlă anăp hŏng lu klei dleh dlan, lông dlăng lehanăn hmăi mơ̆ng klei ruă Covid 19 ƀiădah hlăm thŭn 2021, bruă duh mkra – ala ƀuôn čar Kon Tum ăt mâo dŭm boh tŭ yuôm bhăn, msĕ si: Hnơ̆ng mâo mnơ̆ng dhơ̆ng hlăm yang ƀuôn đĭ 6,47%, hdră mkŏ dăp bruă duh mkra djŏ hdră; Hnư hrui wĭt kah knar grăp čô mâo êbeh 47 êklăk prăk; Hnư hrui wĭt kơ ngăn prăk knŭk kna mâo 3.500 êklai prăk, mâo 100% klei đăo tĭng mâo alŭ wăl jao; Čar mâo 8 să djăp hnơ̆ng čuăn krĭng ƀuôn sang mrâo; Ênoh gŏ êsei ƀun hrŏ 4% mkă hŏng thŭn 2020; Hdră gang mkhư̆ klei ruă Covid 19 dưi hluê ngă kjăp.

Hlăm 2,5 hruê mkŏ mjing klei bi kƀĭn tal 2, Êpul gơ̆ng bruă ƀuôn sang čar Kon Tum srăng lui lu mmông čiăng kơ phung bi ala bi mklă dŭm boh phŭn ngă kơ ênoh čuăn thŭn 2021 amâo dưi mâo mkă hŏng hdră kčah, msĕ si: ênoh anôk bruă duh mkra mkŏ mjing mrâo knŏng mâo 80%, ênhă pla sâm Ngọc Linh pla mrâo giăm 67%... Mbĭt anăn mđing bi trông hluê dŭm mta kñăm, bruă klam lehanăn hdră mđĭ kyar bruă duh mkra – ala ƀuôn, rơ̆ng kjăp klei êđăp ênang thŭn 2022./.

Pô mblang: H’Nêč Êñuôl