VOV4.Êđê - Aguah hruê 22/11, ti sang bruă kƀĭn ala, mphŭn pŏk Klei bi kƀĭn tal 5 mơ̆ng Dhar bruă gĭt gai anôk bruă kƀĭn ala. Klei bi kƀĭn dưi mkŏ mjing hlăm 2 hruê, hlăm anăn Dhar bruă gĭt gai anôk bruă kƀĭn ala brei leh klei blŭ hlăm lu bruă yuôm bhăn. Kơ hdră čih mkra klei bhiăn, Dhar bruă gĭt gai anôk bruă kƀĭn ala brei leh klei blŭ kơ klei čih mkra Hdră bhiăn mơ̆ng Dhar bruă gĭt gai anôk bruă kƀĭn ala, hlak mblang dŭm mta klei hlăm Hdră bhiăn bruă ngă soh jhat. Brei klei blŭ kơ klei akâo kơ knŭk kna thiăm mbŏ 2 klei čih mkra hlăm Hdră bruă čih mkra klei bhiăn, asăp bhiăn mtrŭn thŭn 2022, anăn jing Hdră bhiăn mkra mlih, thiăm mbŏ dŭm mta klei hlăm Hdră bhiăn Tần số vô tuyến điện; Hdră bhiăn ksiêm mkă dlăng, mdrao mgŭn klei ruă (mkra mlih), mbĭt anăn brei klei blŭ kơ bruă sinê bi mklă Klei kuôl kă Ênua yang ƀuôn plah wah Knŭk kna Việt Nam lehanăn Knŭk kna Korea. Ti anôk bi kƀĭn anei, Dhar bruă gĭt gai anôk bruă kƀĭn ala ăt ksiêm dlăng bruă hluê ngă ênoh bi liê, ba yua keh Ênua yang ƀuôn wưng thŭn 2019-2021 lehanăn bi mklă ênoh bi liê bruă kriê dlăng Keh Ênua mdrao mgŭn yang ƀuôn wưng thŭn 2022-2024. Ksiêm dlăng boh tŭ bruă ktuê ksiêm hră m’ar djŏ hdră bhiăn mơ̆ng Êpul hgŭm Djuê ana, dŭm Dhar bruă mơ̆ng anôk bruă kƀĭn ala./.

H’Nêc pô mblang