VOV4.Êđê -  Aguah hruê 21/12, ti Hà Nội, Sang kriê pioh mnơ̆ng dhơ̆ng Phung mniê Việt Nam mphŭn pŏk leh Knăm hưn mdah klei duê hƀuê ênuk lehanăn mnuih jiă knhuah hbuê ênuk mâo anăn “Hluê gru jơ̆ng Đại tướng”, lač jăk kơ Đại tướng Võ Nguyên Giáp. Pô čih mčeh 110 klei yăl dliê anei jing nai mtô, pô mă bruă klei mrâo, pô čih klei duê Nguyễn Thị Mỹ Dung, pô mâo leh klei myun dưi bi tuôm lehanăn čih klei yăl dliê kơ Đại tướng êbeh 20 thŭn êgao.

Hŏng klei khăp lehanăn klei lač jăk prŏng prĭn, nai mtô – pô čih klei duê Nguyễn Thị Mỹ Dung tui duah leh ti anôk Đại tướng Võ Nguyên Giáp tuôm nao msĕ si kđông kahan Cao – Bắc – Lạng, kdrăn mblah Điện Biên… čiăng thâo săng klă hĭn kơ wăl anôk hƀuê ênuk. Êbeh 20 thŭn jih ai tiê kơ bruă, nai mtô – pô čih klei duê Nguyễn Thị Mỹ Dung čih mčeh leh dŭm êtuh klei duê mâo anăn “Hluê gru jơ̆ng Đại tướng” hŏng klei čang hmăng srăng dưi mkŏ mjing sa hdră bruă rang mdah ƀrĭ knăm bi hdơr 110 thŭn Hruê kkiêng kơ Đại tướng Võ Nguyên Giáp.

H’Nêč pô mblang