VOV4.Êđê - Ti Hà Nội, Dhar bruă mặt trận čar kwar Việt Nam, Anôk bi ktưn 5 ƀuôn prŏng hlăm gưl dlông mkŏ mjing leh Klei bi kƀĭn ksiêm wĭt hdră bi ktưn thŭn 2021. Blŭ hrăm ti knăm anei, Khua hlăm Anôk bruă Đảng gưl dlông, Khua dhar bruă mặt trận čar kwar gưl dlông Việt Nam Đỗ Văn Chiến mtă kơ anôk bruă mặt trận dŭm gưl mprăp djăp ênŭm čiăng kơ mnuih hmăi djŏ mơ̆ng klei ruă Covid 19 dưi drông Têt Nhâm Dần klă sĭt jing “Têt mơ̆ng ai tiê khăp čiăng”. Đỗ Văn Chiến mtă kơ 5 ƀuôn prŏng hlăm gưl dlông mprăp čih mkra hdră kčah mkŏ mjing Têt Nhâm Dần thŭn 2022, mđing dlăng kriê kơ gŏ sang knŭk kna dlăng ba, phung kahan êka êkeh, kahan ruă duam, gŏ sang kahan djiê êngiă, boh nik mnuih hmăi djŏ mơ̆ng klei ruă Covid 19. Đỗ Văn Chiến mtă brei lŏ dơ̆ng mlih mrâo kơ boh phŭn, hdră lehanăn hnơ̆ng tŭ bruă ksiêm dlăng, bi tăng mgăl yang ƀuôn, mđing dlăng kơ hdră ksiêm dlăng, mă klei blŭ mơ̆ng mnuih ƀuôn sang kơ dŭm bruă dôk bluh mâo djŏ tuôm kơ klei dưi djŏ hdră bhiăn mơ̆ng mnuih ƀuôn sang./.

H’Nêč pô mblang