VOV4.Êđê- Hlăm jar klei bi trông gưl êpul kơ hră čih Hdră mtrŭn kơ hdră êlan ngă prăk đru pŏk ngă Hdră kơrŭ wĭt leh anăn mđĭ kyar bruă duh mkra- ala ƀuôn, djŏ tuôm kơ bruă duh bi liê knŭk kna, pô bi ala Trần Hoàng Ngân - Khua Anôk bruă ksiêm hriăm mđĭ kyar ƀuôn prŏng Hồ Chí Minh brei thâo: Hlăm ênoh 2 êklăk 870 êbâo êklai prăk duh bi liê knŭk kna mơ̆ng kluôm ala wưng thŭn 2021-2025, adôk hlăm brô 297 êbâo êklai ka bi liê, čiăng duh bi liê kơ dŭm alŭ wăl mâo klei dưi mđĭ ênoh prăk knŭk kna ti Ngŏ kwar Dhŭng. Mĭn tĭng thŭn 2022, ênoh prăk hrui wĭt knŭk kna kluôm ala mâo 1 êklăk 500 êbâo êklai prăl snăn krĭng wăl Ngŏ kwar Dhŭng mâo truh 40%. Ară anei, Phŭn bruă êlan klông dŭ mdiăng hưn mdah leh hŏng Bruă kƀĭn ala 12 hdră bruă ba yua prăk duh bi liê knŭk kna hlăm êlan Dưr - Dhŭng. Hlăm anăn, krĭng Ngŏ kwar Dhŭng leh anăn krĭng Dap mnai krông Cưủ Long knŏng mâo 2 hdră bruă, hlăk êjai ară anei anôk bruă êlan klông krĭng nah Dhŭng amâo đei đĭ kyar hĭn mkă hŏng krĭng nah Dưr.

Pô mblang: H’Zawut Ƀuôn Yă