VOV4.Êđê - Mnuih djŏ mta mlih mrâo Omicron tal êlâo ti Việt Nam mâo čih yap leh. Klei anei mâo anôk bruă ksiêm dlăng klei ruă tưp Việt Nam tŭ mă klei hưn mdah mơ̆ng Sang êa drao lĭng kahan gưl dlông 108 hâo hưn kơ Phŭn bruă mdrao mgŭn. Hruê 19/12/2021, Sang êa drao lĭng kahan gưl dlông 108 hưn, mâo 1 čô tuê đĭ êdeh phiơr ti gưl phiơr QH9028 mơ̆ng Angle wĭt kơ Việt Nam. Test ti tač êdeh phiơr, pô anei djŏ kman SARS-CoV-2. Jing sa čô ruă mrâo wĭt mơ̆ng Angle, hruê 20/12/2021, Sang êa drao ksiêm dlăng leh mta gen mơ̆ng kman SARS-CoV-2 ti pô ruă anei hŏng hdră mrâo, boh tŭ bi mklă đing djŏ mta mlih mrâo Omicron. Anei jing mnuih djŏ mta kman Omicron tal êlâo ti ala čar Việt Nam, jing mnuih mơ̆ng ala tač êngao kyua anăn dưi ba bi ktlah mtam leh mŭt hlăm ala čar. Phŭn bruă mdrao mgŭn brei thâo, dôk ksiêm dlăng kjăp klei ruă Covid 19 lehanăn mta kman Omicron. Mbĭt anăn, mtă kơ mnuih ƀuôn sang hluê ngă kjăp hdră gang mkhư̆, mdrơ̆ng hŏng klei ruă Covid 19 lehanăn hluê ngă djăp ênŭm hdră tlŏ mgang./.

H’Nêč pô mblang