VOV4.Êđê - Tlam hruê 28/12, ti ƀuôn prŏng Ƀuôn Ama Thuôt, Anôk bruă pui kmlă Dak Lak mkŏ mjing leh Knăm bi hdơr 45 thŭn hruê mkŏ mjing  (28/12/1976 - 28/12/2021) lehanăn tŭ mă hră pah mni mơ̆ng Khua knŭk kna. Găn 45 thŭn mkŏ mkra lehanăn đĭ kyar, truh kơ ară anei, PC Dak Lak dôk kriê dlăng êbeh 450 km êlan klei pui 110 kV; êbeh 4000 km êlan klei pui man dưn, 6.200 anôk mđĭ mtrŭn pui kmlă; mkăp pui kmlă kơ êbeh 574.000 čô ba yua ti Dak Lak, mâo giăm 100% ênoh mnuih ba yua pui.

Thŭn anei, khădah klei ruă Covid 19 bluh mâo dleh dưi ksiêm dlăng, anôk bruă ăt mâo hnư hrui wĭt êbeh 3.260 êklai prăk, hrui ba kơ ngăn prăk knŭk kna 50 êklai prăk. Mbĭt hŏng hdră duh mkra, PC Dak Lak lŏ mkŏ mjing lu hdră đru kơ yang ƀuôn. Hlăm 5 thŭn giăm anei, anôk bruă mkăp leh 3,6 êklai prăk duh kơ hdră đru kơ yang ƀuôn – mnuih knap mñai ti dŭm alŭ wăl. Hlăm thŭn 2021, ênoh prăk hluê ngă hdră anei êbeh 880 êklăk prăk. Ƀri bi hdơr 45 thŭn hruê mkŏ mjing, PC Dak Lak mâo leh Khua knŭk kna mđup brei hră pah mni./.

H’Nêč pô mblang