VOV4.Êđê- Hruê mbruê, 30/11, khua phŭn bruă mdrao mgŭn Nguyễn Thanh Long mâo leh klei mă bruă hŏng pô bi ala mơ̆ng êpul bruă mdrao mgŭn dlông rŏng lăn ti Việt Nam, anôk bruă ksiêm dlăng leh anăn gang mkhư̆ klei ruă tưp Mi ti alŭ wăl Ngŏ Dhŭng Asi leh anăn hdră êlan klei êđăp ênang bruă mdrao mgŭn tar rŏng lăn CDC Mi ti Việt Nam kñăm bi kah mbah klei hâo hưn kơ hdră gang mkhư̆ kman mlih mrâo Omicron. Khua phŭn bruă mdrao mgŭn Nguyễn Thanh Long brei thâo, truh kơ ară anei, Việt Nam ka mâo ôh mnuih mâo klei ruă tưp Covid-19 mơ̆ng kman mlih mrâo Omicron. Čiăng čŏng bi mdrơ̆ng hŏng kman anei mŭt hlăm ala čar, phŭn bruă mdrao mgŭn bi êdah kơ knŭk kna ksiêm dlăng, gĭt gai brei mdei êjai dŭm gưl êdeh phiơr nao leh anăn hruê mơ̆ng dŭm ala čar: Dhŭng Afrĭk, Botswana, Namibia, Zimbabwe, Eswatini, Lesotho, Mozambique leh anăn mdei êjai klei brei mŭt hlăm ala čar mơ̆ng phung tuê hiu čhưn ênguê hriê mơ̆ng dŭm ala čar kơ dlông. Dŭm êpul êya kơ dlông brei thâo, srăng mprăp klei kah mbha leh anăn hưn mthâo klei hlăk mblang Gene mơ̆ng dŭm čô mnuih ruă Coví-19 čiăng mâo klei hâo hưn đru kơ Việt Nam bi mdrơ̆ng hŏng dŭm mta kman mlih mâo mơ̆ng kman SARS-CoV-2.

Pô mblang: H’Zawut Ƀuôn Yă