VOV4.Êđê- Tui Êpul kiă kriê bruă klei đăo čar Daknông brei thâo, hlăm čar Daknông ară anei mâo hlăm brô 160 êbâo 420 čô phung đăo, 70 čô jing khua kiă kriê, 77 boh Sang Aê Diê. Hlăm dŭm thŭn êgao, phung đăo Khop hlăm car Daknông mâo đru mguôp leh truh 28 êklai 864 êklăk prăk ti anăp, dŭm êbâo hrue ai mă bruă mđrăm mbĭt hŏng bruă sang čư̆ êa alŭ wăl mkra êlan hlăm krĭng ƀuôn sang. Ară anei kluôm čar mâo 29/60 boh să mâo tŭ yap leh djăp ênoh čuăn krĭng ƀuôn sang mrâo.

Mâo hĕ boh tŭ dưn anăn kyuadah jih bruă kđi čar, lehanăn êpul êya yang ƀuôn, hlăm anăn mâo phung khua kiă kriê, phung đăo khop bi mguôp. Điểu Khuyên mnuih djuê ana Mnông, khua ƀuôn Bu Bir, să Quảng Tín, kdriêk Dak Rlâp lač, bon hlăk ktưn truh kơ thŭn mrâo bi djăp ênoh čuăn “Krĭng ƀuôn sang mrâo dưi lŏ mđĭ hĭn”. Dŭm hrue anei mâo leh lu phung ƀuôn sang mtluk mtlak drông mơak Noel, ƀiădah ăt mâo mơh klei răng kơ klei ruă tưp Covid 19.

“Lač, jing tơdah amâo mâo ôh klei ruă tưp snăn phung ƀuôn sang truh hlăm dŭm hrue knăm mơak thŭn mrâo lehanăn noel mkŏ mjing hlue knhuah mnuih Mnông pô. Noel leh ruĕ, snăn truh kơ thŭn mrâo. Ară anei, klei ruă tưp dôk dleh dlan, mơak mâo yơh, ƀiădah knŏng mkŏ mjing mă hjăn mdê bi sang, amâo mâo mkŏ mjing lu mnuih ôh”./.

Pô mblang: Y-Khem Niê