VOV4.Êđê - Aguah mbruê 14/12, ti adŭ bruă bi kƀĭn Diên Hồng, sang bruă kƀĭn ala, phŭn bruă kđi čar, êpul khua bruă Đảng mkŏ mjing leh klei kƀĭn trông bruă hŏng tač êngao kluôm ala tui ngă hdră mtrŭn mơ̆ng klei kƀĭn kluôm Đảng tal 13 hŏng êlan online bi mguôp hŏng klă anăp. Khua gĭt gai Đảng Nguyễn Phú Trọng nao hgŭm leh anăn mâo klei blŭ gĭt gai yuôm bhăn hlăm klei kƀĭn anăn. Anei jing klei kƀĭn trông bruă hŏng tač êngao kluôm ala mơ̆ng Đảng, bruă hŏng tač êngao knŭk kna, bruă hŏng tač êngao mnuih ƀuôn sang leh anăn wăt kơ bruă kđi čar. Klei kƀĭn trông anei jing wưng kluôm dhar bruă hŏng tač êngao lŏ wĭt dlăng bruă tui ngă leh anăn bi trông kơ dŭm hdră êlan čiăng mkŏ mjing mâo boh tŭ dưn mbruă klam kñăm hŏng bruă tač êngao hlăm dŭm thŭn kơ anăp. Anei ăt jing wưng kơ dŭm gưl bruă, dhar bruă leh anăn alŭ wăl leh anăn phung knuă druh bruă hŏng tač êngao thâo săng klă hĭn kơ boh sĭt, kơhưm ala čar pô hlăm alŭ wăl leh anăn tar rŏng lăn, boh tŭ dưn leh anăn klei yuôm bhăn mơ̆ng bruă hŏng tač êngao hlăm bruă rŭ mdơ̆ng leh anăn răng mgang ala čar, mkŏ mjing klei mlih mrâo, gĭr ktưn leh anăn ai ktang kơ kluôm bruă kđi čar, dŭm gưl, dhar bruă, grăp êpul êya leh anăn grăp čô hlăm bruă hŏng tač êngao.

Y-Ƀel pô mblang