VOV4.Êđê- Aguah mbrue (4/1) ti sang bruă kƀĭn ala, pŏk leh klei bi kƀĭn mjêč mơ̆ng Bruă kƀĭn ala gưl 15, hlue hdră online mkŏ hŏng 62 anôk ti dŭm čar, ƀuôn prŏng. Êlâo kơ pŏk klei bi kƀĭn, Phung bi ala bruă kƀĭn ala nao ti anôk bi kƀĭn hlăm sang bruă kƀĭn ala nao dưm leh kwang mnga, nao čuă msat Khua gĭt gai Hồ Chí Minh. Blŭ pŏk klei bi kƀĭn, Khua bruă kƀĭn ala Vương Đình Huệ tă leh jih hdră kơ klei bi kƀĭn yuôm bhăn čiăng kơ phung bi ala mđing trông čhai, anăn jing ksiêm dlăng lehanăn bi klă dŭm hdră êlan ngăn prăk pioh kơrŭ wĭt bruă duh mkra, ksiêm dlăng dŭm hdră mtrŭn kơ klei duh bi liê mkra êlan dơ̆ng prŏng pral Dưr Dhŭng tĭng Nah Ngŏ wưng thŭn 2021 – 2025.

Ti anôk bi kƀĭn anei, Bruă kƀĭn ala ăt ksiêm dlăng, bi klă kơ bruă mlih mrâo đa đa hdră bhiăn, thiăm mbŏ kơ dŭmmta hlăm hdră bhiăn knŭk kna duh bi liê, hdră bhiăn duh bi liê hlue ngă hgŭm knŭk kna lehanăn êngao knŭk kna, hdră bhiăn duh bi liê, hdră bhiăn hrŏng ruah pô ngă bruă, hdră bhiăn pui kmlă, hdră bhiăn phung duh mkra, hdră bhiăn jia mnơ̆ng yuôm bhăn, lehanăn hdră bhiăn phat mkra kđi klei yang ƀuôn. Leh pŏk klei bi kƀĭn Bruă kƀĭn ala hmư̆ knŭk kna ba mdah hră mơ̆ng 3 hdră čih mkra hdră mtrŭn lehanăn čih mkra sa hdră bhiăn./.

Pô mblang: Y-Khem Niê