VOV4.Êđê - Êbeh 20 thŭn siă suôr hŏng Sang hră gưl dua Nguyễn Trường Tộ, ti să Êa H’Đĭng, kdriêk Čư̆ Mgar, čar Dak Lak, nai mtô Lương Hữu Hải khădah hdĭp hjăn păn hlăm sang jưh ƀiădah ñu đru leh kơ dŭm êtuh čô hđeh ƀun amâo mâo mdei sang hră krah dưh. Amâo djŏ knŏng mtô boh hră, nai lŏ đru kơ phung hđeh sang kbưi dưi dôk ti sang jưh amâo liê prăk, mtrŭt mjhar đru brei čhum ao, hdruôm hră, êdeh wai jơ̆ng đru kơ phung hđeh mâo klei hdĭp dleh dlan, đru rông ba phung hđeh dưi nao sang hră m’ar, bi sĭt klei čang hmăng.

Lu thŭn hŏng anei, sang jưh knhal tuič êlan ti Ƀuôn Ea Sang, să Ea H’Đĭng, kdriêk Cư̆ M’gar čar Dak Lak, jing leh anôk dôk êđăp ênang kơ phung hđeh sang hră ƀun ƀin mnuih djuê ƀiă. Dŭm adŭ hlăm sang jưh anei mơ̆ng Lương Hữu Hải, sa čô nai mtô klei Angle, khua kiă kriê bruă Đội ti sang hră gưl 2 Nguyễn Trường Tộ mưn adôk, anôk anei đru kơ 30 čô hđeh sang hră mâo anôk dôk amâo mă prăk, leh anăn jing anôk ñu lŏ mtô klei Angle amâo mă prăk kơ hlăm brô 150 čô hđeh sang hră mâo klei hdĭp dleh dlan. Mbĭt hŏng anăn, nai Lương Hữu Hải jing pô đru rông ba lu hđeh sang hră mâo klei hdĭp dleh dlan. Jing sa hlăm dŭm čô hđeh mâo klei đru rông ba mơ̆ng nai Hải, adei H’Basuđi Mlô brei thâo: “Gŏ sang kâo knap mñai êdi, amĭ ama nao mă bruă kbưi sơăi. Dua čô amai adei dôk hŏng aduôn aê, mơ̆ng hruê mâo nai Hải đru mơ̆ng mnơ̆ng ƀơ̆ng huă truh kơ kdrăp čŭt hơô, kâo mâo klei lač êdi. Kâo srăng gĭr ktưn, čiăng kơ nai mâo klei mơak.”

Nai Lương Hữu Hải mâo leh klei bi mguôp hŏng sang hră gưl 2 Nguyễn Trường Tộ, ti să Ea H’Đĭng, kdriêk Cư̆ Mgar, čar Dak lak êbeh leh 20 thŭn. Anei jing sa boh sang hră krĭng mnuih djuê ƀiă, klei hdĭp mnuih ƀuôn sang dôk mâo lu klei dleh dlan. Yal dliê kơ bruă pô ngă, nai Lương Hữu Hải brei thâo: “Kâo pô mâo leh klei bi mguôp hŏng krĭng Lăn Dăp Kngư mơ̆ng hlăk kâo điêt, mơ̆ng adŭ 3, adŭ 4. Êlâo dih ăt dleh dlan êdi čiăng nao sang hră mơar, kyua mâo phung nai, ƀĭng găp đru, kâo lŏ wĭt ti nei, kâo čiăng ngă bruă kyua čiăng bi hdơr kơ phung nai. Boh nik ti nei jing krĭng mnuih djuê ƀiă, klei hdĭp phung hđeh sang hră dôk mâo lu klei dleh dlan, klă klơ̆ng klei phung hđeh kbiă sang hră jing lu êdi, kyuanăn kâo ƀuh pô mâo sa kdrêč bruă klam đru kơ diñu.”

Bùi Đình Thảo, khua kiă kriê sang hră gưl 2 Nguyễn Trường Tộ brei thâo, krĭng mnuih djuê ƀiă tiah kbưi anei, grăp čô nai amâo djŏ knŏng ngă bruă mtô mjuăt ôh, ƀiădah lŏ mâo bruă klam, mtrŭt mjhar, đru kơ hđeh amâo kbiă sang hră mơar. Lu thŭn hŏng anei, nai Lương Hữu Hải jing sa čô nai mâo klei bi hmô, ba anăp ngă dŭm bruă klam anei. “Nai Lương Hữu Hải hlăm dŭm êgao mâo leh dŭm bruă ngă klă klơ̆ng, boh nĭk hlăm bruă hâo hưn, mtrŭt mjhar, đru mkăp brei mnơ̆ng yua kơ phung hđeh sang hră, boh nik jing phung hđeh sang hră ƀun ƀin ti sa Ea H’Đĭng leh anăn wăt kơ sang hră gưl 2 Nguyễn Trường Tộ. Ñu dưi hgao leh dŭm klei dleh dlan pô, kyua ară anei ñu ăt dôk mâo lu klei dleh dlan, dôk hjăn păn, amâo mâo pưk sang. Ñu čuăn ruah sa bĭt sang jưh čiăng đru kơ phung hđeh sang hră, boh nik đru rông ba phung hđeh ƀun ƀin amâo mâo anôk dôk. Grăp mmăt ñu lŏ mtô amâo mă prăk kơ phung hđeh giăm sang jưh anăn. Hmei ăt mâo klei mkăp brei tal êlâo hruê mmông leh anăn kdrăp yua, đru kơ bruă kčĕ hŏng bruă sang čư êa alŭ wăl hŏng dŭm bruă mơ̆ng nai Lương Hữu Hải”

Nguyễn Hữu Nhất, khua bruă sang čư êa să Ea H’Đĭng brei thâo, grăp thŭn nai Lương Hữu Hải dưi đru leh anăn mtrŭt mjhar hlăm brô 30 čô hđeh lŏ wĭt nao sang hră msĕ yăng đar. Mơ̆ng akŏ thŭn hriăm anei, nai Hải mâo leh klei iêo mthưr klei bi mguôp dŭm êpul pŏk hdruôm hră hriăm, čhum ao mrâo, êdeh wai jơ̆ng… hŏng ênoh giăm 200 êklăk prăk, đru kơ phung hđeh sang hră mnuih djuê ƀiă. Hlăm gưl klei ruă tưp Covid-19 bluh đĭ mrâo leh êgao, nai Hải lŏ mâo klei iêo mthưr bi mguôp 65.000 čiăm guôm ƀô̆, êbeh 460 lit êa drao mdjiê kman leh anăn 21 boh masin mkă hnơ̆ng hlơr asei đru kơ alŭ wăl gang mkhư̆ klei ruă tưp. “Hŏng dŭm bruă mkŏ hŏng dŭm êpul bi mguôp klei khăp hlăm čar leh anăn êngao čar, nai Hải mâo leh klei kñăm ksiêm dlăng kơ hđeh sang hră krĭng mnuih djuê ƀiă mâo klei dleh dlan kơ hdruôm hră hriăm, kdrăp yua. Nai Hải ngă leh dŭm klei nao đru kơ lu hđeh sang hră hlăm alŭ wăl. Hlăm bruă gang mkhư̆ klei ruă tưp, ñu ăt mâo leh klei bi mguôp hŏng phung mâo ai tiê kmah, đru dŭm hnư mnơ̆ng kơ mnuih ƀun ƀin, dleh dlan, phung ngă klei bi ktlah, kwang dar. Iêo mthưr bi mguôp kơ dŭm sang hră masin mkă hnơ̆ng hlơr asei leh anăn čhiăm guôm ƀô̆.”

Hŏng klei khăp, nai Lương Hữu Hải lui leh bruă pô kơ tluôn, đru kơ dŭm êtuh čô hđeh sang hră dleh dlan dưi nao sang hră mơar, jing mnuih tŭ jăk kơ yang ƀuôn.