VOV4.Êđê - Phŭn bruă Dhar kreh – Mjuăt ktang asei mlei lehanăn hiu čhưn ênguê brei thâo, thŭn 2022, anôk bruă hiu čhưn ênguê lŏ dơ̆ng pŏk ngă dŭm hdră mtrŭn mtrŭt mđĭ, ƀrư̆ ƀrư̆ lŏ krŭ wĭt hdră bruă hiu čhưn ênguê, atăt tuê hiu čhưn lehanăn mdrơ̆ng hŏng klei hmăi ruă tưp Covid 19. Hluê anăn, Phŭn bruă Dhar kreh – Mjuăt ktang asei mlei lehanăn hiu čhưn ênguê bi mklă 5 êpul bruă klam, hdră msir čiăng ƀrư̆ ƀrư̆ lŏ pŏk ƀăng anôk bruă hiu čhưn ênguê, hlăm anăn mđing tal êlâo hlăm bruă rơ̆ng kjăp klei êđăp ênang hlăm hdră gang mkhư̆ klei ruă Covid 19, đru kơ anôk bruă duh mkra mtrŭt mđĭ pral hdră lŏ krŭ wĭt lehanănmđĭ kyar klei thâo mnuih mă bruă djŏ hŏng klei čiăng lŏ krŭ wĭt anôk bruă hiu čhưn ênguê. Lŏ dơ̆ng hluê ngă dŭm hdră mtrŭn bi hrŏ, lui, bi tai wưng tĭng jia, prăk tăk; đru bi hrŏ prăk mnga čan prăk kơ dŭm anôk bruă duh mkra duh bi liê kơ bruă hiu čhưn ênguê, dŭm anôk bruă duh mkra mphŭn čô̆ kơ bruă hiu čhưn ênguê... Kơ bruă rơ̆ng kjăp klei êđăp ênang ti anôk hiu čhưn kơ phung tuê hiu čhưn, hluê si K’iăng khua knŭk kna Vũ Đức Đam brei hluê ngă kjăp hdră gang mkhư̆, ksiêm dlăng kjăp klei ruă tưp hlăm wưng hnưm hĭn kñăm dưi pŏk ƀăng hŏng klei h’ĭt kjăp./.

       H’Nêč pô mblang