VOV4.Êđê- Aguah mbruê, hluê si mmông alŭ wăl, ti Tokyo, hlăm klei nao čuă klă klơ̆ng ala čar Japon, Khua knŭk kna Phạm Minh Chính nao hgŭm leh hlăm klei bi tuôm, mă bruă hŏng khua gĭt gai dŭm êpul grŭp prŏng mơ̆ng Japon hlăm bruă mlih mrô. Hlăm klei mă bruă anăn, Khua knŭk kna Phạm Minh Chính brei thâo: Mrâo êgao, klei ruă tưp Covid-19 mtrŭt mđĭ ktang leh bruă mlih mrô ti Việt Nam. Hlăm 20 thŭn êgao, hnơ̆ng mnuih yua dŭm hdră bruă online knŏng mâo mă 12%, ƀiădah knŏng hlăm wưng tlâo mlan tal 1 leh mâo klei ruă tưp Covid-19, hnơ̆ng anei mâo leh klei đĭ 2 blư̆ truh kơ 24%. Việt Nam mâo 80% hđeh sang hră, sinh viên ngă hdră hriăm online, lu hĭn mkă hŏng hnơ̆ng kah knar dlông rŏng lăn. Knŭk kna Việt Nam mâo leh lu hdră êlan, hdră mtrŭn mtrŭt mđĭ klei mkăp pioh, mâo mtă kñăm dưi mŭt hlăm 50 ala čar mâo klei mkăp pioh pŏk hlăm thŭn 2025, êpul 30 ala čar hlăm thŭn 2030. Blŭ hlăm klei mă bruă anăn, Khua knŭk kna mñă klă, bruă mlih mrô srăng mâo klei nao hgŭm mơ̆ng knŭk kna, mnuih ƀuôn sang leh anăn knơ̆ng bruă, mă anak mnuiih jing mta kñăm, djăp mta bruă srăng mđĭng truh kơ mnuih ƀuôn sang leh anăn knơ̆bng bruă. Bi kơ dŭm boh klei dôk mâo klei uêñ mĭn mơ̆ng phung bi ala, Khua knŭk kna bi êdah hdră êlan mơ̆ng Việt Nam jing bi mrâo mrang hmar bruă ngăn prăk, knơ̆ng bruă ngăn prăk ciăng kơ dŭm bruă anei ba anăp hlăm bruă mlih mrô.

Pô mblang: Y-Ƀel Êban