VOV4.Êđê - Thŭn anei jing thŭn tal êlâo êbeh 150 gŏ êsei mnuih Mông mơ̆ng hdră bruă knơ̆ng kdơ̆ng êa Akŏ krông Pač, čar Dak Lak dưi drông thŭn mrâo ti anôk dôk mrâo. Dŭm gưl bruă sang čư̆ êa alŭ wăl să truh kơ čar dôk mđing êdi kơ krĭng anei lehanăn ƀrư̆ ƀrư̆ mjing tur knơ̆ng kjăp čiăng kơ mnuih ƀuôn sang h’ĭt ai tiê dôk hdĭp, mă bruă knuă, ƀuăn srăng mâo sa klei hdĭp jăk siam hĭn. Ƀri akŏ thŭn mrâo 2022, pô čih klei mrâo mơ̆ng Sang mđung asăp blŭ VN mâo klei čih “Yan mnga ti krĭng anôk dôk mrâo mơ̆ng hdră bruă knơ̆ng kdơ̆ng êa Akŏ krông Pač.

Hrue hlăm akŏ thŭn mrâo 2022, ayŏng Ma Văn Cỡ, djuê ana Mông, ti alŭ Yang San, să Čư̆ San, kdriêk Êa Kar, car Daklak nao čuă lŏ. Lŏ ñu mâo 5 sao mrâo rah pla êbeh mkrah mlan, ñu dôk hlăm ênoh phung đuĕ nao dôk kơ anôk mrâo čiăng mkŏ mkra ala ƀuôn pla phŭn sa anôk, tui si hdră ngă bruă mơ̆ng Knơ̆ng êa akŏ krông Pač. Sa nah jing mnuôr mbông êa ling lang bŏ hŏng êa, sa nah lĕ jing sa kdrăn lŏ hlăk hlê đĭ jing mtah siam, ayŏng Cỡ lač, phung ƀuôn sang amâo mâo huĭ kơ klei kƀah êsei huă ôh. Dôk ti djiêo guê lŏ, ñu ktrâo phă ƀuôn hŏng klei mơak brei thâo, knŭk kna mkŏ mkra brei leh ala ƀuôn pla phŭn sa anôk, jing jăk găl êdi, anôk pla mjing jĕ hŏng anôk dôk mơh, jing jăk kơ phung ƀuôn sang. Leh 6 mlan đuĕ nao dôk kơ anôk mrâo, gŏ sang ñu dơ̆ng hơĭt kơ klei hdĭp mda, mâo pưk sang kjăp. Cỡ đăo knang kơ klei knŭk kna đru mbĭt hŏng klei gŏ sang ñu gĭr, klei hdĭp diñu mgi dih srăng đĭ kyar hĭn: “Phung ƀuôn sang hdĭp mda kơ anei, snăn srăng hlŏng hdĭp lă lar, ară anei knŏng gĭr duah ƀơ̆ng đuič yơh, čiăng kơ hơĭt klei hdĭp mda. Ăt čiăng hơêč hmưi mơh kơ jih jang ayŏng adei, phung ƀuôn sang hriê hdĭp kơ anei mâo klei hdĭp hơĭt, lehanăn myun mdan hlăm klei duah ƀơ̆ng”.

Vàng Seo Sàng, khua alŭ anôk dôk mrâo ti Yang San, să Čư̆ Êa Lang, kdriêk Êa Kar, čar Daklak brei thâo, phung ƀuôn sang thâo săng kơ klei mkŏ mkra ala ƀuôn pla phŭn sa anôk hlăm sa blư̆ kơ dŭm êtuh gŏ sang, hŏng dŭm êbâo čô mnuih jing sa klei dleh dlan êdi, lehanăn năng bi mâo lu hrue mlan kơh dưi hơĭt. Wưng leh êgao, dŭm gưl bruă sang čư̆ êa ăt gĭr đru kơ phung ƀuôn sang, lehanăn dŭm gŏ sang đuĕ mơ̆ng krĭng wăl ênao akŏ Krông Pač, ti să Čư̆ San, kdriêk Mdrak hriê dôk ti să Čư̆ Êa Lang, kdriêk Êa Kar. Phŭn tal êlâo, dŭm gŏ sang đuĕ dôk kơ anôk mrâo hơĭt leh klei hdĭp mda. Boh nik, bruă duh bi liê kơ êlan klei pui kmlă, êlan klông, sang hră mơar, mâo rŭ mkra hŏng klei jăk sơăi, anak aneh mâo hriăm giăm hĭn hlăm ƀuôn mơh, đru leh kơ phung ƀuôn sang hơĭt ai tiê duh ƀơ̆ng. Ară anei dŭm gŏ sang mâo mbha leh sơăi lăn lŏ, lehanăn hlăk dôk guôn mbha mbĭt hŏng lăn hang. Ƀiădah phung ƀuôn sang ăt kmang kơ čang guôn đei kơ klei knŭk kna đru rei, hŏng ênoh čiu hnô kah knar kgŭ 1 êklai prăk gŏ sang, leh mbĕ đuĕ mơ̆ng krĭng ênao êa akŏ krông Pač, lu gŏ êsei čŏng tui duah lăn blei lăn hma. Bruă pla mjing kơ anei jing jăk găl kyua mâo lu êa mđoh mơ̆ng knơ̆ng kdơ̆ng êa Êa Rơt, jing sa kdrêč mơ̆ng knơ̆ng kdơ̆ng êa akŏ krông Pač, mâo tĭng mkă leh kơ klei čuăl mkă mkăp êa yua kơ alŭ wăl anôk dôk mrâo, jing yuôm bhăn êdi. Dôk ti krah alŭ wăl mrâo rŭ mkra ƀuôn sang, Vàng Seo Sàng hŏng klei đăo knang lač, dleh snăk dưi mâo dŭm boh sang kjăp siam msĕ hŏng anôk mkŏ mkra ala ƀuôn mrâo anei. Jih jang djăp mta klei găl hlăm lu mta đru leh phung ƀuôn sang mâo ai tiê thâo gĭr hlăm klei duah ƀơ̆ng, mđĭ kyar klei hdĭp: “Kâo đăo knang kơ phung ƀuôn sang bi gĭr hĭn, ktưn kyua anak aneh pô. Phung ƀuôn sang hdĭp nah anei mâo êlan klông jăk, lehanăn jih jang pui kmlă, êa jua, sang hră mơar jăk leh sơăi, phung ƀuôn sang knŏng gĭr duah ƀơ̆ng đuič yơh”.

Mã Văn Cương, k’iăng khua knơ̆ng bruă sang čư̆ êa să Čư̆ Ea lang, kdriêk Êa Kar, čar Daklak brei thâo, ară anei mâo leh 160/230 gŏ sang ti să Čư̆ San, kdriêk Mdrak mbĕ nao dôk tal êlâo mơ̆ng krĭng ênao knơ̆ng kdơ̆ng êa akŏ Krông Pač. Jih jang dŭm gŏ sang mbĕ nao dôk anăn, mâo leh bruă sang čư̆ êa să tiŏ nao knuă druh pioh đru phung ƀuôn sang mdơ̆ng sang, ƀrư̆ ƀrư̆ bi hơĭt klei hdĭp hlăm anôk dôk mrâo. Asei Cương pô mtam yơh dưi jao ngă khua bruă Đảng alŭ ƀuôn mrâo, mơ̆ng anăn păn kjăp ai tiê klei mĭn phung ƀuôn sang, pral dưi mghaih msir jih jang klei akâo, ba mtruh kơ nah dlông. Ară anei, jih jang dŭm bruă prŏng kơ klei hdĭp mda ala ƀuôn mâo mghaih msir jăk leh. Knŏng klei kơ lăn pla mjing, phung ƀuôn sang mrâo tŭ mă 5 sao lăn lŏ, bi 5 sao lăn hma dôk guôn knŭk kna mbha. Bi leh jih jang bruă anei snăn alŭ wăl mkŏ mkra ala ƀuôn mrâo dưi nga hŏng klei jăk leh. Čiăng mđĭ ai phung ƀuôn sang êjai drông thŭn mrâo ti anôk dôk mrâo, kdriêk lehanăn să bi liê leh sa ênoh, lehanăn iêo mkrum hlăm yang ƀuôn, mprăp mnơ̆ng, blei ŭn, blei mnŭ đru kơ phung ƀuôn sang drông thŭn mrâo h’uh mđao, mơak mñai: “Kdriêk bi mguôp leh hŏng să, lehanăn jih jang bruă kđĭ čar hlăm alŭ, tinei mkŏ mjing jăk leh mơh, mơ̆ng êpul bruă Đảng, êpul čŏng kia kriê alŭ mâo mkŏ mjing mơ̆ng mlan 9/thŭn 2021, jih jang ênŭm leh sơăi. Đru kjơ phung ƀuôn sang hŏng mnơ̆ng, lŏ iêo phung duh mkra bi mkrum đru pioh mprăp mnơ̆ng. Gĭrr čiăng kơ phung ƀuôn sang mâo drông thŭn bhang mrâo mơak mñai”.

Thŭn mrâo 2022, hlăk dôk khŏk ƀăng, klei hdĭp mda phung ƀuôn sang hlăk anôk mkŏ mkra ala ƀuôn mrâo mrô 1 mơ̆ng knơ̆ng kdơ̆ng êa akŏ krông Pač, ti să Čư̆ Ea lang, kdriêk Êa Kar, čar Daklak ăt hlăk ƀrư̆ ƀrư̆ dưi jing leh sa anôk hơĭt anôk dôk h’ôk duh ƀơ̆ng. Mâo leh dŭm boh sang siam kjăp, mâo leh lŏ mtah mda čăt đĭ, mâo dŭm war boh kruĕ mmih, boh kruĕ dŭng, lehanăn lu ana boh kroh mkăn ăt hlăk hlê dôk mjut mjing, hŏng sa klei đăo knang kơ klei hdĭp mgi dih jăk yâo hĭn hŏng phung ƀuôn sang mbĕ dôk ti Čư̆ Ea lang anei./.