VOV4.Jarai-Ƀơi mông jơnum hăng ƀing čih tơlơi pơhing mơ̆ng Khua mua git gai pơhlôm pơgang klin Covid 19 tlam lơ 1/11, khua mua pơ ala gơnong bruă ia jrao ƀôn prong Hồ Chí Minh lăi, bruă tlâ̆o ia jrao vaccine kơ čơđai mơ̆ng 12-17 thun, khom ngă djơ̆ tơlơi pơtrun mơ̆ng Ding jum ia jrao, ƀu tlâ̆o ôh kơ čơđai gah yŭ 12 thun.

Ơi Trịnh Duy Trọng, Khua anom bruă kơđi čar tơlơi pơmin, Gơnong bruă Pơtô hăng Pơjuăt ƀôn prong Hồ Chí Minh brơi thâo, ră anai ăt dŏ 236 boh anih pơtô hrăm mă yua pioh ngă bruă pơgang klin Covid 19 aka jao glăi ôh. Him lăng blan 11/2021, abih bang anih anun amra dưi jao glăi.

Jơnum hăng ƀing čih tơlơi pơhing phrâo mơ̆ng Khul git gai pơgang Covid 19

 ƀôn prong Hồ Chí Minh

Pơdjơ̆ nao kơ tơlơi pơhing, lăi hơmâo hơdôm anih, sang hră pơtrut amĭ ama čơđai sang hră tŭ ư brơi tlâ̆o pơgang kơ čơđai sang hră hrăm anih 6 aka djop 12 thun kiăng tlâ̆o pơgang djop, ơi ia jrao Nguyễn Hồng Tâm, Kơ-iăng Khua anom bruă ĕp lăng tơlơi duăm ruă ƀôn prong Hồ Chí Minh brơi thâo, bruă tlâ̆o ia jrao kơ čơđai hnưr anai khom ngă djơ̆ tơlơi pơtô ba mơ̆ng anom bruă pơkra rai ia jrao vaccine hăng tơlơi pơtô mơ̆ng Ding jum ia jrao.

Nay Jek: Pơblang