VOV4.Jarai-Tơlơi pơhing phrâo hloh, lu mơnuih pơđing nao, anun lĕ 144 čô mơnuih dŏ amăng kual pơgăn ƀu brơi nao rai jơlan weh anet 189/1 Mai Hắc Đế, phường Tân Thành, plơi prong Ƀuôn Ma Thuôt, Dak Lak lêng kơ hơmâo boh tơhnal brơi ƀuh giong mă ia khak ba pơčrang kman ƀu ƀuh kman virus SARS-CoV-2 ôh.

Samơ̆, ăt kŏn ngă amưng lơi, bruă pơhlôm pơgang klin Covid 19 gong gai kơnuk kơna hăng anom bruă hơmâo tơlơi dưi mơ̆ng tơring čar Dak Lak ăt pok pơhai khut khăt .

Tơdơi kơ ƀuh mơnuih ƀă kman Sars-cov-2 blung a, anom bruă ia jrao tơring čar Dak Lak hlong ngă hră pơtrun mơ-it kơ djop sang bruă gah yŭ, brơi ngă tui tơlơi pơtrun hiăp ƀu brơi pơdơi ôh, kŏn pơphun brơi grup khua mua hyu hrăm, ĕp lăng, čuă ngui pơ anih pơkŏn ôh, yua kiăng hơmâo djop mơnuih mă bruă djru pơhlôm pơgang klin Cơvid 19.

Tui hăng anun, pơtrun hiăp djop sang bruă, anom bruă gah gơnong bruă ia jrao ƀu pơsir hră brơi ôh hră rơkâo pơdơi hơdôm hrơi yua kơ bruă sang anŏ ƀudah bruă hơgĕt aka ƀu kiăng ječ, kơ djop mơnuih mă bruă ngă khua hăng mơnuih mă bruă ƀong prăk blan, kơnong hơmâo tơlơi kiăng ječ ameč biă kah pơsir; ƀu pơphun hyu hrăm, ĕp lăng bruă ngă, čuă ngui amăng dêh čar hăng tač rơngiao amăng hrơi blan arăng lăi klin Covid 19 hlăk ƀă hyu kơtang; pơtum djop mơnuih mă bruă djru hrom pơhlôm pơgang klin; djă hnong djop mơnuih mă bruă, kiăng pơhlôm djop bruă dưi pơgang, pơjrao mơnuih duăm ruă amăng sang ia jrao anet prong, hmao kru pơsir bruă kiăng, wai lăng hăng pơđĭ tui tơlơi suaih pral kơ mơnuih ƀôn sang amăng tơring čar.

Mơnuih mă bruă gah ia jrao Anom bruă ĕp lăng tơlơi duăm ruă tơring čar mă ia khak ƀơi rơkông đok mơnuih ƀôn sang anih guang dar jơlan weh 189/1 Mai Hắc Đế ba pơčrang kman

Laih dơ̆ng kơtưn ĕp lăng, ƀư̆ pơkra bruă ngă tui tơlơi pơtrun kơ pơhlôm, pơgang klin ƀơi djop sang bruă; khua sang bruă, anom bruă khom glăm ba ƀơi anăp Khua Gơnong bruă ia jrao hăng ƀing hlơi ngă khua, mơnuih apăn bruă, mơnuih apah mă bruă ƀu ngă tui djơ̆ tơlơi pơtrun pơhlôm, pơgang klin Cơvid 19; jao kơ khul pel ĕp bruă mă mơ̆ng Gơnong bruă ia jrao tơring čar git gai ngă hrom djop anih mă bruă, anom bruă djơ̆ hrom hyu ĕp lăng, sem glăi pok pơhai bruă mă hơdôm boh yom phun tơlơi git gai kơ bruă pơhlôm, pơgang klin Cơvid 19 ƀơi djop sang bruă, anom bruă pô wai lăng; pơsir khut khăt djop anom bruă, mơnuih pô ngă soh bruă pơhlôm, pơgang klin duăm ruă.

Gơnong bruă ia jrao ăt pơtrun hiăp djop anom bruă pok pơhai, ngă tui djơ̆, tơpă hnong hơdră pơhlôm pơgang klin Cơvid 19 tui hăng tơlơi git gai mơ̆ng anom bruă hơmâo tơlơi pơtrun hiăp mơ̆ng dlông, tơlơi git gai mơ̆ng Jơnum min mơnuih ƀôn sang tơring čar ƀơi hră pơtrun mrô 3743, lơ 4/5/2021 mơ̆ng Jơnum min mơnuih ƀôn sang tơring čar hăng hơdôm tơlơi pơtrun mơ̆ng Gơnong bruă ia jrao brơi pơhlôm, pơgang klin Cơvid 19.

Lăng nao kơ bruă mă, tơlơi dưi, anŏ gơgrong hăng tơlơi pơhing mơnuih mă bruă amăng sang bruă, anom bruă ngă hrom khul mơnuih anom bruă djop tơring glông, plơi pla pơkra hơdră, akŏ bruă, pok pơhai hơdôm bruă mă  boh yom phun amăng bruă mă gah ia jrao pơphô brơi lơ̆m hrơi blan pơgang bruă plĕ hră ruah khua pơ ala mơnuih ƀôn sang dêh čar tal XV hăng ƀing pơ ala mơnuih ƀôn sang djop gưl amăng tơring čar mơ̆ng thun 2021-2026.

Hăng djop anih pơjrao tơlơi duăm ruă, Gơnong bruă ia jrao pơtrun hiăp brơi pơpha bruă mă djơ̆ găl hăng tơlơi pơhing mơnuih duăm ruă, pơpha bruă mă tum teč, mơnuih ngă bruă, pơpha khul grup mă bruă bơblih nao rai; čih dăp hơdră hlâo bong glăi tui hăng tơlơi čih pơthâo mông ječ ameč klin Covid 19 lar hyu kơtang, amăng anun hơmâo akŏ bruă tum teč  pơpha bruă mă bơblih nao rai, ba mơnuih duăm mơ̆ng sang ia jrao anet nao pơ sang ia jrao prong, tŭ jum mơnuih duăm ruă, pơjrao đĭ pran, pel ĕp kman duăm ruă, pơgăn anŏ ƀă hyu kman amăng anih pơjrao duăm ruă lơ̆m hơmâo tơlơi ječ ameč truh ƀơi anih pơjrao duăm ruă.

Ƀơi anăp kơ tơlơi tơnap tap mơ̆ng klin Covid 19 ngă, gong gai kơnuk kơna tơring glông Čư̆ Mgar, tơring čar Dak Lak hlăk kơtưn ngă tui djơ̆ hơdôm hơdră pơtrun brơi pơhlôm, pơgang klin. Dơ̆ng mơ̆ng hơmâo sa čô mơnuih ƀă klin yua glăi mơ̆ng Đà Nẵng, mah mă laih ia khak ba pơčrang tal sa ƀu ƀuh kman ôh, samơ̆ anŏ hŭi ƀă kman klin ăt dŏ bơngơ̆t đôč, khul khua mua git gai pơhlôm pơgang klin Covid 19 tơring glông Čư̆ Mgar hơmâo pơphun bruă mă khut khăt pơhlôm pơgang klin hăng hơdră kơđiăng kơtang hloh.

Laih dơ̆ng. sem glăi, jŭ yap, wai lăng tong ten bruă ngă tui amăng  tơring glông, pơhlôm pơgang klin, boh nik ñu amăng anih hơmâo lu mơnuih ƀôn sang dŏ pơtum.

Ƀơi sang sĭ mơdrô pơtum lu mơnuih či Quảng Phú-anih phun ba hyu gơnam sĭ mơdrô kơ tơring glông Čư̆ Mgar, Khua mua wai lăng sang čơ hyu pơtă pơtăn na nao mơnuih ƀôn sang, jak iâu ƀing sĭ mơdrô, ƀing nao blơi gơnam khom truă bơnal gôm ƀô̆ sit sĭ mơdrô, blơi gơnam, tơdah  pơhiăp nao rai tơdruă hăng mơnuih mut tơbiă amăng sang čơ; pơsur mơnuih ƀôn sang sĭ mơdrô pơhiăp nao rai ƀiă mơnit đôč, blơi tañ, sĭ hmar, ƀu dưi pơtum lu mơnuih kah hăng hlâo adih ôh...

Hơdôm hơdră ngă tui anai, hơmâo mơnuih ƀôn sang dong yua, tŭ ư ngă hrom soh. Djop anih sĭ mơdrô, anih bơwih bơwang sĭ mơdrô huăi ječ đơi ôh ăt pơdơi abih kah hăng anih sĭ mơdrô ia mơñum, ƀong huă ngui ngor, adoh karaoke, pơnah ƀiya krư̆ bah amăng abih, pơdơi mă bruă soh.

Ƀơi anăp kơ tơlơi hŭi rơhyưt klin kheng ƀă hyu tui anun, Jơnum min mơnuih ƀôn sang tơring čar Dak Lak hơmâo ngă hră pơtrun kơ bruă pok pơhai lu hơdră pơhlôm, pơgang klin amăng tơring čar yua dah hơmâo laih mơnuih ƀă kman Cơvid 19.

Tui hăng anun, tơring čar Dak Lak git gai Khua jơnum min mơnuih ƀôn sang djop tơring glông, djop să ngă hrom djop sang bruă djơ̆ hrom mơ̆ng kơnuk kơna brơi ngă tui hơdră pơhlôm pơgang klin amăng tơring čar dơ̆ng mơ̆ng krah mlam mơguah mơnŭ tơdjô̆ lơ 10/5/2021 ngă tui hơdră pơhlôm pơgang khut khăt, tơl hơmâo tơlơi lăi pơthâo phrâo dơ̆ng kah bơblih.

Nay Jek: Pơblang