VOV4.Jarai-Tơring čar Kon Tum hơmâo 187 boh anom ngă ƀong hrom hăng rơbêh 9.600 čô ngă ding kơna hăng mơnuih mă bruă. Bong ƀơi anăp tơlơi tơnap tap klin kheng Covid 19 ngă, ƀu ƀiă ôh anom ngă ƀong hrom ƀơi Kon Tum hơmâo ngă klă pran jua thâo gum pơgôp, hơdră ngă bruă thâo pơčeh phrâo, kiăng găn rơgao tơlơi lông lăng laih anun amra ngă bruă pơđĭ kyar tơdơi kơ klin abih.

Anom ngă ƀong hrom ngă hmua bơkơnar Pô Kô, tơring kual Đak Hà, tơring glông Đak Hà, Kon Tum hơmâo 113 čô ding kơna hăng 172 hektar hmua pla kơphê, bơwih brơi bruă pơkra ming kơ-uă tơpung kơphê sĭ mơdrô jơman kơ jar kmar. Klin kheng Covid 19 hơđuh rai, anom ngă ƀong hrom aka ƀu hơmâo hơdră prăp lui tong ten ôh kơ tơlơi či hơmâo djơh hăng anai, anun yơh lu hră pơar pơkôl sĭ mơdrô dŏ kơđông hĭ rơbêh 1 thun pơkă hăng akŏ bruă.

Hrom hăng anun, rơnoh prăk apah ƀattô ia rơsĭ đĭ pơmă, yôm tui, hơdôm kôngtenơr dưm gơnam sĭ mơdrô či pơgiăng nao kơƀah hĭ, kơphê sĭ mơdrô hăng tač rơngiao gun hĭ hăng tơnap tap ba sĭ mơdrô. Kiăng djă hnong bruă mă pơkra ming sĭ mơdrô, anom bruă ngă ƀong hrom bơkơnar Pô Kô pơsủ ƀing ngă ding kơna pla gơnam pơkŏn rơngiao kơphê, kah hăng rơtă rơbai, pla rơnga kiăng hơmâo gơnam sĭ mơdrô pơhrua jăng jai laih anun pơhrŏ ƀiă rơnoh prăk tuh pơ alin kơ bruă kơphê, Dơ̆ng mơ̆ng phun kơphê hăng hơdôm mơta djuai phun pla plah wah, anom bruă ngă ƀong hrom hơmâo pơkra rai 2 mơta gơnam sĭ mơdrô amăng dêh čar, kah hăng tơpung kơphê dưm amăng phin hăng pĕ kơphê tơsă abih bang laih anun pơkra tra mơ̆ng braih hna, pơdai ia tơsâo pioh mơñum klă kơ pran jua, pơgang tơlơi suaih pral.

Yă Phạm Thị Thanh Huyền Anh tal dua mơ̆ng gah ieo lăi pơthâo măi hna kơphê Anom ngă ƀong hrom phrâo blơi pioh kơ-uă kơphê tơpung sĭ mơdrô

Thun 2020 rơnoh prăk pơhrui glăi mơ̆ng anom ngă ƀong hrom hơmâo rơbêh 18 klai prăk. Yă Phạm Thị Huyền Anh, Khua wai lăng anom bruă ngă ƀong hrom đang hmua bơkơnar Pô Kô lăi, anom bruă gơñu hơmâo bơblih lu hơdră kiăng djơ̆ găl hăng bruă sĭ mơdrô laih anun kiăng ngă kjăp tui bruă mă amăng bơyan hơmâo klin Covid 19:

Hlâo adih gơmơi kơnong sĭ mơdrô pơ dêh čar tač rơngiao hăng sĭ mơdrô raih daih, ră anai gơmơi ăt hơmâo pơmin ĕp glăi hăng akŏ pơjing bruă mă ngă hiư̆m pă dưi sĭ mơdrô kơphê pô amăng dêh čar Việt Nam ta pô blơi.

 Laih dơ̆ng ngă hrom djop anom bruă kah hăng hơdôm anih pơpha hyu sĭ mơdrô amăng Việt Nam, pơjing rai sa glông ngă bruă Online. Tui anun rơngiao kơ bruă pơkrem rơnoh prăk apah anih dưm pơdă gơnam sĭ mơdrô lĕ gơmơi lăi pơthâo bruă mă mơ̆ng Anom ngă ƀong hrom ăt kah hăng gơnam pơkra ming rai kơ anih sĭ mơdrô amăng dêh čar ta pô".

Ƀuh rơđah ƀơi Kon Tum, mah klin Covid 19 ngă gun bruă, tơnap tap kơ tơlơi bơwih ƀong huă, sĭ mơdrô pơkra ming, samơ̆ hăng pran jua thâo gum pơgôp nao rai laih anun pơphun klă ngă hrom lu sang bruă pơkŏn ăt pơđĭ kyar hơđong mơ̆n.

Đang boh makka hlăk mơboh mơ̆ng Anom ngă ƀong hrom Makka Nhân Hòa

Pơ thôn 3, să Kon Đào, tơring glông Đak Tô, anom ngă ƀong hrom Makka Nhân Hòa hơmâo 9 ding kơna. Klin Covid 19 ngă kơ anih sĭ mơdrô kơđông hĭ, nua trun samơ̆ anom ngă ƀong hrom anai ăt tuh pơ alin djơ̆ hơdră mơ̆n, kah hăng pok prong đơ đam pla phrâo, tuh pơ alin blơi măi mok pioh pok kơđuh mơtah, ƀhu krô hăng răk lui sui hrơi blan. Ơi Nguyễn Văn Quyết, Khua anom bruă ngă ƀong hrom Makka Nhân Hòa brơi thâo:

Amăng hrơi blan klin kheng ngă ƀing gơmơi hơmâo lu khul mơnuih ngă hrom lu ding kơna. Gơmơi gum hrom mă bruă, kơsem min, ngă hrom pơđĭ kyar, djru prăk kăk jing pran kơtang. Phun Makka lĕ djuai phun kyâo hrup boh khuih ƀong jơman khom kơsem min tong ten. Rĭm čô hơduah ĕp mă jơlan hơdră mă bruă kiăng găn rơgao hĭ tơlơi lông lăng tơnap tap.

Gơmơi pơtum glăi rĭm ding kơna hơmâo tơlơi thâo, anŏ gêh găl phara, pơtum hĭ, ngă hrom kiăng pơđĭ kyar, ba glăi boh tơhnal hiam klă kơ tơlơi hơdip mơda abih bang ding kơna amăng anom bruă ngă ƀong hrom.

Tui hăng jŭ yap mơ̆ng Anom ngă ƀong hrom tơring čar Kon Tum brơi ƀuh, năng ai 80% mrô anom ngă ƀong hrom bơbeč yua mơ̆ng klin Covid 19 ngă. Tui hăng ơi Nguyễn Bá Lộc, ding kơna ngă ƀong hrom gah bruă ngă hmua bơkơnar Pô Kô, tơnap tap samơ̆ anom bruă gơñu bưp lĕ hrom abih bang soh. Ơi Lộc lăi lĕ, lơ̆m ngă hrom anom ngă ƀong hrom mơnuih ngă hmua găn rơgao tơlơi tơnap tap gêh găl hloh:

Mut ngă ding kơna anom ngă ƀong hrom ba glăi lu boh tơhnal tŭ yua, yua kơ dưi djru nao rai tơlơi thâo thăi, djru kmơ̆k pruai tuh pơ alin hăng blơi kơphê nua hơđong, đĭ hloh gah rơngiao 2.500 prăk. Rĭm thun kah hăng thun anai, anom ngă ƀong hrom tuh pơ alin kơ mơnuih ngă hmua 1 ha lĕ sa tơn kmơ̆k. Tui anun plai ƀiă rơngiă prăk tuh pơ alin mơnuih ngă hmua tuh pơ alin mă pô. Mah nua sĭ mơdrô tơnap tap samơ̆ ta mut hrom ngă ding kơna anom bruă ngă ƀong hrom ăt plai ƀiă mơ̆n tơnap.

Tui hăng ơi Nguyễn Lâm Cảnh, Khua wai lăng djop anom bruă ngă ƀong hrom tơring čar Kon Tum, amăng bruă ngă găn rơgao tơlơi tơnap tap pơkra ming sĭ mơdrô, tơlơi gum pơgôp nao rai, tŭ ư hrom mă bruă mơ̆ng ding kơna sang bruă ngă ƀong hrom yôm biă mă; tơlơi hơdeč hmar amăng bruă mă, gir run hrom mơ̆ng khua mua wai lăng anom ngă ƀong hrom, yôm biă mă.

Mut ngă ding kơna anom ngă ƀong hrom bruă hmua bơkơnar Pô Kô tơlơi tơnap tap mơ̆ng sang anŏ ơi Nguyễn Bá Lộc plai ƀiă

Hrom hăng anun, dŏ hơmâo tơlơi djru mơ̆ng keh prăk brơi čan. Keh prăk brơi mơnuih ngă hmua čan pơsir hmao kru ngă hră pơar dưi čan prăk, djru ding kơna mơnuih ngă ƀong hrom amuñ tuh pơ alin hơduah ĕp anih sĭ mơdrô. Gah kơ anom bruă wai lăng djop sang bruă ngă ƀong hrom tơring čar, ơi Nguyễn Lâm Cảnh ăt brơi thâo, khul ngă hrom ăt gơgrong klă amăng bruă djru kơ djop sang bruă ngă ƀong hrom pơđĭ kyar:

Khul wai lăng djop anom bruă ngă ƀong hrom tơring čar lăi pơthâo, dăp bruă djơ̆ kơ khua mua wai lăng bruă pơđĭ kyar anom bruă ngă hrom lu ding kơna djop gưl, gum hrom mă bruă, ba glăi boh tŭ yua kơplah wah djop anom bruă pok pơhai ngă tui jơlan hơdră bơwih ƀong hrom laih anun pơđĭ tui tơlơi gơgrong mơ̆ng ding kơna pơtrut pơđĭ kyar gah anom bruă ngă ƀong hrom.

Bruă ƀu ƀiă ôh anom ngă ƀong hrom tơring čar Kon Tum ngă klă tơlơi gum pơgôp, hơmâo jơlan hơdră mă bruă thâo pơčeh phrâo, găn rơgao klin kheng Covid 19, sa bruă mă lăp pơtrut pơsur pok pơlar ngă tui, yua dah amăng hrơi blan klin kheng ngă, lu bruă gun sĭ mơdrô ĕp anih blơi gơnam, tơdah ƀu hơmâo tơlơi gum pơgôp tơnap biă mă ngă giong bruă jao. Tơlơi anai ăt brơi ƀuh, rơnoh yôm hơdră ngă ƀong hrom mơ̆ng sa boh tơring čar tơlơi gêh găl bơwih ƀong huă, mơnuih mơnam dŏ lu tơlơi tơnap tap kah hăng Kon Tum lăp bơni biă mă hơdră ngă anai.

Nay Jek: Pơblang