VOV4.Jarai - Pơmĭn yua kơ hŭi rơngiă gru grua sô hơđăp mơng djuai ania Jarai, 2 adơi amai Hà Kpă H’Huyền hăng Hồ Thị Hồng Nhung (Sang hră gưl tlâo Plei Me, tơring glông Čư̆ Prong, tơring čar Gialai) lĕ dua čô čơđai gum tơngan hrŏm amăng akŏ bruă “Pel ĕp tơlơi tŭ yua amăng bruă djă pioh tơlơi akhan đưm mơng djuai ania Jarai lơ̆m akhan pơƀuh wŏt rup brơi čơđai sang hră gưl sa djuai ania Jarai”. Amăng tal pơplông tơlơi thâo pơčeh phrâo gưl tơring čar brơi ƀing čơđai sang hră gưl tlâo tal VII (thun hrăm 2020-2021), Akŏ bruă anai hơmâo mă pri prong hloh.

Amăng hơdôm hrơi blan 3 ayuh hyiăng pơ-iă kơtang, H’Huyền hăng Nhung ăt hur har pioh mông kiăng kơ lăi pơthâo hơdôm hơdrôm hră čih glăi tơlơi akhan đưm mơng djuai ania Jarai mơ̆ dua gơñu ĕp pơƀut glăi, dăp hơdră ră anai hơmâo lu čơđai djuai ania Jarai amăng să Ia Ga, tơring glông Čư̆ Prong, tơring čar Gialai hmư̆ hing.

H’Huyền hăng Hồng Nhung ĕp glăi hơdôm tơlơi akhan đưm djuai ania Jarai

Lăi pơthâo yua hơget dua gơñu ruah tơlơi akhan đưm nao pơplông, H’Huyền brơi thâo: “Djuai ania Jarai lĕ djuai ania ƀiă dŏ hơdip mơng đưm đă ră hlâo ƀơi tơring čar Gialai hăng lu gru grua yôm phara. Samơ̆, hrŏm hăng tơlơi mut hrŏm hăng pơđĭ kyar, hơdôm gru grua yôm anai glăk jai hrơi rơngiă tui. Hrŏm hăng anun, gru grua yôm phara djuai ania Jarai hơmâo lu biă mă samơ̆ aka ƀu djă pioh hăng lăi pơthâo lăp djơ̆. Lĕ sa čô ană tơčô djuai ania Jarai, ñu kiăng pơgôp đơset amăng bruă djă pioh hăng lăi pơthâo gru grua djuai ania pô amăng hơdôm tơlơi akhan tuai bơră ruai anai”. Amon Hồ Thị Hồng Nhung brơi thâo: “Ră anai, hơdôm anih hrăm hră gưl sa aka ƀu đing nao bruă kiăng pơmut hrŏm tơlơi hrăm wŏt pơtô glăi gru grua djuai ania pô brơi kơ ƀing čơđai sang hră, kiăng pơgôp djă pioh hăng lăi pơthâo gru grua djuai ania pô, lăp djơ̆ hăng tơlơi kiăng amăng pơplih phrâo hơdră pơtô hrăm ră anai”.

Tui tơlơi črâo ba mơng nai pơtô Hoàng Việt Trung – Khua khul hlăk ai sang hră, H’Huyền hăng Hồ Thị Hồng Nhung pơphun akŏ bruă anai hăng pran gơgrong hloh. H’Huyền brơi thâo: Kiăng kơ thâo rơđah tơlơi pơmĭn mơng ƀing čơđai djuai ania Jarai, grup ƀing gơñu hơmâo hyu tơña 300 čô čơđai sang hră gưl sa amăng să hăng čih pơƀut glăi. Mơng anun brơi ƀuh, tơlơi akhan đưm mơng djuai ania Jarai aka ƀu hơmâo lu mơnuih thâo ôh. Kơnong 10,7% mrô čơđai juăt hmư̆ tơlơi akhan đưm Jarai yua kơ ơi yă hăng ƀing neh met wa akhan glăi; dŏ glăi sui sui ƀudah ƀiă đôč hmư̆. Tơlơi anai ngă kơ ƀing čơđai ƀu thâo tơlơi yôm mơng tơlơi akhan đưm djuai ania Jarai kah hăng bruă djă pioh bưp tơnap tap biă mă.

Tui hăng hơduah ĕp hăng anŏ phara amăng kual kơsem min, 2 čô čơđai sang hră hơmâo pơmĭn nao mơtăm kơ hơdră djă pioh tơlơi akhan đưm mơng djuai ania Jarai lơ̆m tơlơi akhan pơƀuh wŏt rup. Hrŏm hăng 6 tơlơi akhan djuai ania Jarai mă mơng hơdôm hơdrôm hră sô hơđăp mơng mơnuih čih pơƀut glăi Rmah Del, Hồng Nhung hăng H’Huyền hơmâo ĕp pơƀut glăi dong 4 tơlơi akhan. Hơdôm tơlơi akhan anai tơdơi anun hơmâo ƀing gơñu čih pơkra glăi, kač rup brơi lăp djơ̆ hăng ƀing mơnuih kiăng pơđok lĕ ƀing čơđai sang hră gưl sa. Tơlơi akhan glông 53 pok hră hơmâo pơpha jing 3 črăn: Tơlơi akhan lăi nao hlô mơnong, tơlơi akhan lăi nao tơlơi hơdip mơda hăng tơlơi akhan lăi nao yang rơbang.

Hà Kpă H’Huyền hăng Hồng Nhung dưi mă pri prong hloh amăng tal pơplông pơčeh boh thâo phrâo

Tơdơi kơ tơlơi akhan đưm pơƀuh wŏt rup čih pơkra pơgiong, H’Huyền hăng Hồ Thị Hồng Nhung hơmâo hơduah ĕp hăng rơkâo nai wai lăng anih hrăm ƀing gơñu pơphun mă yua lông lăng amăng hơdôm mông hrăm hmư̆ tơlơi akhan brơi kơ ƀing čơđai sang hră anih 3,4 hăng 5. Anŏ ba glăi yôm phăn biă mă, ƀing čơđai hor hmư̆ lơ̆m akhan pơƀuh wŏt rup, laih dong pơblang bơh tơhnal mơng hơdôm tơlơi akhan anai truh pơ gơyut gơyâo hăng sang anŏ; laih anun ƀuăn amra gum hrŏm hyu ĕp pơƀut glăi hơdôm tơlơi akhan đưm kiăng kơ djă pioh.

Nai Hoàng Việt Trung, Khua khul hlăi ai mut phung sang hră gưl tlâo Plei Me, tơring glông Čư̆ Prong, tơring čar Gialai brơi thâo: amăng 6 blan mơtăm, nai hăng ƀing čơđai hơmâo gum hrŏm, laih dong pơsit akŏ bruă kơsem min, tơdơi anun dăp hơdră jing hơdôm boh tơhnal pioh hơduah ĕp, yua lông lăng … H’Huyền hăng Hồ Thị Hồng Nhung hơmâo ĕp pơƀut glăi rơbêh 30 tơlơi akhan đưm mơng djuai ania Jarai. Samơ̆, amăng tal pơplông kơ tơlơi thâo pơčeh phrâo laih rơgao, nai hăng čơđai sang hră ba nao 10 tơlơi akhan lăp djơ̆ hăng rơnuk lĕ ƀing čơđai hrăm gưl sa. Dưi mă pri prong hloh, nai hăng ƀing čơđai hok mơ-ak biă mă. Hơmâo thâo, jơlan hơdră pơtô hrăm phrâo hơmâo wŏt bruă pơtô gru grua djuai ania pô. Čang rơmang, tơlơi akhan pơƀuh wŏt rup amra jing sa tơlơi pơtô hrăm amăng sang hră gưl sa amăng să.

Siu Đoan: Pơblang